Read Свето Писмо (Гаврилова) 1990 Матеј 3 Bible Online

Матеј 3 - Свето Писмо (Гаврилова) 1990 bible

Матеј 3

¹Во тие дни дојде Јован Крстител и проповедаше во пустината Јудејска,

²и говореше: »Покајте се, зашто се приближи царството небесно!«

³Оти овој е, навистина оној за кого рекол пророкот Исаија: »Гласот на оној, што вика во пустината, вели: ‚Пригответе го патот на Господа и исправете ги патеките Негови!‘«

⁴А сам Јован имаше облека од камилски влакна и појас од кожа околу слабините, а храната му се состоеше од скакулци и див мед.

⁵Тогаш од Ерусалим и цела Јудеја и од целиот крај Јордански доаѓаа при него

⁶и се крштаваа од него во реката Јордан, исповедувајќи ги своите гревови.

⁷А штом виде Јован дека при него доаѓаат мнозина фарисеи и садукеи за да се крстат, им рече: »Породи змиини, кој ви кажа да бегате од гневот што иде?

⁸Направете плод достоен за каење

⁹и немојте да говорите во себе: ‚Наш татко е Авраам‘ зашто Бог може, ви велам, и од овие камења да му издигне чеда на Авраама.

¹⁰Секирата веќе лежи при коренот на дрвото: зашто секое дрво, што не дава добар плод, се сече и се фрла во оган.

¹¹Јас ве крштавам за покајание со вода, но Оној што иде по мене е посилен од мене; јас не сум достоен да Му ги понесам ни обувките; Он ќе ве крсти со Дух Свети и со оган.

¹²Лопатата е во рацете Негови и Он ќе го очисти гумното Свое и ќе Си го прибере житото во амбар, а плевата ќе ја изгори со оган што не гасне.«

¹³Тогаш дојде Исус од Галилеја на Јордан при Јована за да се крсти од него.

¹⁴А Јован Го одвраќаше, велејќи: »Јас треба од Тебе да бидам крстен, а Ти при мене ли — доаѓаш?«

¹⁵Но Исус му одговори и рече: »Остави го сега тоа, зашто нам ни претстои да ја исполниме секоја правда.« Тогаш Јован Го остави.

¹⁶И штом се крсти, Исус веднаш излезе од водата. Одеднаш Му се отворија небесата, и Го виде Духот Божји да слегува како гулаб и да се спушта над Него.

¹⁷И ете, глас од небесата говореше: »Овој е Мојот возљубен Син, Кој е по Мојата волја!«