Read Свето Писмо (Гаврилова) 1990 Марко 15 Bible Online

Марко 15 - Свето Писмо (Гаврилова) 1990 bible

Марко 15

¹И веднаш утредента првосвештениците и книжниците, и целиот Синедрион, направија совет, па како Го врзаа Исуса, Го одведоа и Го предадоа на Пилата.

²А Пилат Го праша: »Ти ли си Царот Јудејски?« Он одговори и рече: »Ти велиш.«

³И првосвештениците Го обвинуваа многу. Но Он не одговори ништо.

⁴А Пилат пак Го праша и рече: »Ништо ли не одговараш? Гледаш колку многу сведочат против Тебе!«

⁵Но Исус ништо веќе не одговори, така што Пилат се чудеше.

⁶А на секој празник им отпушташе по еден осуденик, кого што ќе го побараа.

⁷И беше еден осуден, по име Варава, заедно со придружниците, што во една буна извршиле убиство.

⁸И кога извика народот, почна да го моли Пилата да им го направи она, што им го правел секогаш.

⁹А тој им одговори и рече: »Сакате ли да ви Го пуштам Јудејскиот Цар?«

¹⁰Оти знаеше дека првосвештениците Го беа предале од завист.

¹¹Но првосвештениците го наговорија народот да бара да им го пушти Варава.

¹²Пилат, пак, им одговори и рече: »Што сакате да направам со Оној, што Го именувате Цар Јудејски?«

¹³Тие одново извикаа, велејќи: »Распни Го!«

¹⁴Пилат им рече: »Што зло направил?« Но тие уште посилно извикаа: »Распни Го!«

¹⁵Тогаш Пилат, сакајќи да му угоди на народот, им го пушти Варава; а Исуса Го бичува и Го предаде да Го распнат.

¹⁶Војниците, пак, Го одведоа внатре во дворот, односно во преторијата, и повикаа цела чета,

¹⁷па Му облекоа багреница, и откако сплетоа трнов венец, Му го кладоа на главата;

¹⁸и почнаа да Го поздравуваат: »Радуј се, Царе Јудејски!«

¹⁹И Го биеја по главата со трска и плукаа на Него; паѓајќи на колена, и Му се клањаа.

²⁰А кога Го исмеаја, Му ја соблекоа багреницата, Му го облекоа Неговото облекло и Го поведоа на Го распнат.

²¹И го натераа некој си Симон Киринеец, таткото на Александар и на Руф, кој се враќаше од поле, да му го носи крстот.

²²Па Го одведоа на местото Голгота, што значи: место на черепи.

²³И Му дадоа да пие вино со смирна, но Он не зеде.

²⁴Тие што Го распнаа, ги разделија алиштата Негови, фрлајќи ждреб, кој што да земе.

²⁵Беше третиот час, и Го распнаа.

²⁶И имаше натпис за вината Негова: »Цар Јудејски.«

²⁷А со Него распнаа и два разбојника, едниот од десната Негова страна, а другиот од левата.

²⁸И се исполни Писмото, кое вели: »И меѓу грешници Го ставија.«

²⁹А минувачите, вртејќи со глава, Го хулеа и велеа: »Аха! Ти, што го уриваш храмот и за три дни го соѕидуваш,

³⁰спаси Себеси и слези од крстот!«

³¹Исто така и првосвештениците заедно со книжниците му се смееја и велеа: »Другите ги спасуваше, а Себе не може да се спаси.

³²Христос, Царот Израилев, нека слегне сега од крстот, па да видиме и да поверуваме!« Го хулеа и распнатите со Него.

³³А во шестиот час настана темнина по целата земја, до деветтиот час.

³⁴И во деветтиот час Исус извика гласно, велејќи: »Елои, Елои, Лама савахтани?« А тоа значи: »Боже Мој, Боже Мој, зошто си Ме оставил?«

³⁵Некои од оние, што стоеја таму, штом го чуја тоа, рекоа: »Ете, го вика Илија.«

³⁶А еден отрча, натопи сунѓер во оцет, па како го закачи на трска, Му даваше да пие, велејќи: »Почекајте да видиме, ќе дојде ли Илија да Го симне?«

³⁷Исус, пак, кога испушти висок глас, издивна.

³⁸И црковната завеса се расцепи на две, одозгора додолу.

³⁹А стотникот, што стоеше спроти Него, кога виде дека Он, откако извика така издивна, рече: »Навистина Овој Човек бил Син Божји!«

⁴⁰А имаше и жени што гледаа оддалеку; меѓу нив беше и Марија Магдалина, и Марија, мајката на малиот Јаков и на Јосија, и Саломија,

⁴¹кои и тогаш, кога Он беше во Галилеја, врвеа по Него и Му служеа, и многу други што беа дошле со Него во Ерусалим.

⁴²А кога се стемни веќе, бидејќи беше петок, односно спроти сабота,

⁴³дојде Јосиф од Ариматеја, прочуен член на советот, кој и сам го очекуваше царството Божјо, се осмели и влезе при Пилата и го помоли за телото Исусово.

⁴⁴Пилат се зачуди дека Он веќе умрел: и кога го извика стотникот, го праша дали одамна умрел.

⁴⁵Па штом узна од стотникот, му го даде телото на Јосифа.

⁴⁶А Јосиф купи плаштаница, Го симна и Го обви во плаштаницата и Го положи во гроб, што беше издлабен во карпа; и навали камен на гробната врата.

⁴⁷А Марија Магдалина и Марија Јосиева гледаа, каде Го полагаат.