Read Свето Писмо (Гаврилова) 1990 Второзаконие 21 Bible Online

Второзаконие 21 - Свето Писмо (Гаврилова) 1990 bible

Второзаконие 21

¹Ако во земјата, што Господ, твојот Бог, ти ја дава да ја наследиш, се најде убиен човек во полето, и не се знае, кој го убил,

²нека излезат твоите старешини и судии и нека го измерат растојанието од убиениот до градовите наоколу;

³и старешините на градот, кој е најблиску до убиениот, нека земат јуничка, кој не била спрегната и која не носела јарем,

⁴и старешините од тој град нека ја одведат таа јуничка во сув необработен и незасејуван дол, и таму во долот нека ја заколат јуницата;

⁵потоа нека пристапат свештениците, синовите Левиеви, бидејќи Господ, твојот Бог, нив ги избра да Му служат и да благословуваат од името Негово, и според зборовите нивни да се пресуди секоја расправија и секоја причинета штета,

⁶и сите старешини од тој град, најблискиот до убиениот, нека си ги измијат рацете над главата на јуницата каде што ѝ се пресечени жилите во долот,

⁷па да објават и да кажат: нашите раце на ја пролеаја оваа крв и нашите очи не видоа;

⁸милостив биди спрема луѓето Твои во Израилот, кој Ти, Господи, го изведе од Египетската земја, за да нема невина крв во Израилот. И тие ќе се очистат од крвта.

⁹Така треба да ја отстрануваш од себеси крвта на невиност, ако сакаш да правиш добро и угодно пред Господа, твојот Бог.

¹⁰Кога ќе излезеш во бој против непријателите свои, и Господ, твојот Бог, ќе ти ги предаде во рацете твои, и ти ќе ги заробиш нив,

¹¹па видиш меѓу заробените жена убавица, и ја засакаш, и ќе посакаш да си ја земаш за жена,

¹²одведи ја во домот Твој, и нека ја истриже таа главата своја и нека ги исече ноктите свои,

¹³нека ја соблече ропската облека, нека живее во домот твој, и да го оплакува таткото свој и мајката своја цел месец; потоа можеш да влезеш при неа, и да ѝ станеш маж, и таа да ти биде жена.

¹⁴Ако, пак, отпосле таа не ти е по волја, отпушти ја, но не продавај ја за сребро, ниту ја имај за робинка, зашто ти си ја унижил.

¹⁵Ако некој има две жени — едната омилена, а втората несакана, па тие и двете му родат синови и ако првородениот син му е од несаканата жена,

¹⁶тогаш, при поделбата на имотот меѓу синовите, тој не може да даде првенство на синот од омилената жена, место на првородениот од несаканата,

¹⁷туку е должен да го признае за свој првенец синот од несаканата жена и нему да му даде двоен дел од сиот свој имот, бидејќи тој е почеток на неговата сила; нему му се паѓа правото на првородство.

¹⁸Ако некој има буен и непокорен син, којшто не го слуша гласот на својот татко и гласот на својата мајка, па иако го казнувале, тој пак е непослушен,

¹⁹тогаш татко му и мајка му нека го земат и одведат при старешините на градот и при вратите на своето местоживеење,

²⁰па нека им кажат на градските старешини: »Овој наш син е буен и непокорен, не ги слуша нашите совети, расипник е и пијаница«; —

²¹тогаш сите мажи од градот негов нека го каменуваат до смрт; така исчистете го злото од самите себе, и другите ќе чујат и ќе се уплашат.

²²Ако некој направи грев, што заслужува смрт, па биде умртвен, и ти го обесиш на дрво,

²³телото негово да не преноќева на дрвото, туку погреби го истиот ден, зашто проклет е од Бога секој што виси на дрво, и не осквернувај ја земјата, која Господ, твојот Бог, ти ја дава во наследство.