Read Свето Писмо (Гаврилова) 1990 Второзаконие 22 Bible Online

Второзаконие 22 - Свето Писмо (Гаврилова) 1990 bible

Второзаконие 22

¹»Ако видиш теле од братот твој или овца негова заскитана на пат, не оставај ги, туку потерај ги кај братот твој;

²ако, пак, братот твој, не е близу до тебе, прибери ги во домот твој, и нека останат кај тебе, додека братот твој не ги побара, и тогаш врати му ги;

³така постапувај со оселот негов, така постапувај со облеката негова, така постапувај со секоја загубена работа на братот твој, што тој ќе ја загуби, а ти ја најдеш: од тоа не смееш да се отклонуваш.

⁴Ако го видиш оселот на братот твој или телето негово, паднати на патот, не оставај ги, туку крени ги со него заедно.

⁵Жена не треба да носи машка облека, и маж не треба да се облекува во женска облека: секој, што го прави тоа, одвратен е пред Господа, твојот Бог.

⁶Ако најдеш на патот птичје гнездо на некое дрво или на земја, со птички или јајца, и мајката седи над птичките или на јајцата, не ја земај мајката заедно со малите:

⁷мајката пушти ја, а малите земи ги, за да ти биде добро, и да ти се продолжат деновите твои.

⁸Ако градиш нова куќа, направи околу неа ограда, за да не предизвикаш убиства, ако падне некој од неа.

⁹Да не садиш во лозјето твое лози различни, па да не се осветат плодот и семињата, со кои ќе го посееш плодот на лозјето твое.

¹⁰Да не ораш со јунец и осел заедно.

¹¹Да не облекуваш облека, ткаена мешано од волна и лен заедно.

¹²Направи си рески на четирите краишта од наметката твоја, со која се наметнуваш.

¹³Ако некој земе жена, и влезе при неа, па ја намрази,

¹⁴и ја обвини за порочни дела и пушти лоши зборови за неа, и каже: ‚ја зедов оваа жена, влегов при неа, и не ја надов девица‘,

¹⁵тогаш таткото на момата и мајката нејзина нека ги земат и нека ги изнесат девствените белези на момата при старешините пред портата;

¹⁶и таткото на девојката нека им каже на старешините: ‚му ја дадов ќерката моја за жена на овој човек, а сега тој ја намрази,

¹⁷и ете, ја обвинува за порочни дела, велејќи: »не ја најдов ќерката твоја девица«; но еве ги девствените белези на ќерката моја.‘ И да ја распростре долната облека нејзина пред старешините од тој град.

¹⁸Тогаш градските старешини да го фатат мажот и да го казнат,

¹⁹и да го глобат со сто сикли сребро, и тоа да му го дадат на таткото од девојката, поради тоа што нанел зло на израилска девица; таа, пак, да си остане негова жена, и тој да не може да се разведе од неа преку целиот живот.

²⁰Ако, пак, кажаното излезе вистина, и таа не биде најдена како девица,

²¹тогаш нека ја доведат момата пред вратата на таковата ѝ куќа, и градските мажи нака ја каменуваат до смрт, бидејќи извршила срамно дело во Израилот, го осквернила татковиот дом; така истребувајте го злото од себе.

²²Ако некој биде фатен да лежи со мажена жена, тогаш и обајцата да бидат предадени на смрт: и мажот кој лежел со жената, и жената: така истребувајте го злото од Израилот.

²³Ако некоја девица, свршена за маж, ја сретне некој во градот и легне со неа,

²⁴тогаш и обајцата да ги доведете пред портата на тој град и да ги претепате со камења до смрт: момата поради тоа што не викала во градот, а мажот, поради тоа што ја осквернил свршеницата на ближниот свој: така истребувајте го злото од себе.

²⁵Ако, пак, некој сретне во полето мома свршена, па ја силува, да биде погубен само мажот, кој лежел со неа,

²⁶а на момата не правете ѝ ништо; кај момата нема грев за смрт: тоа е исто, како кога некој стане против ближниот свој и го убие;

²⁷бидејќи тој ја сретнал во полето, а свршената мома и да викала, немало кој да ја спаси.

²⁸Ако некој сретне девица несвршена, па ја силува, и ги затечат, —

²⁹тогаш оној, што лежел со неа, да му даде на таткото од момата педесет дидрахми во сребро, а таа да биде негова жена, бидејќи тој ја осрамотил; преку целиот живот свој тој не може да се разведе од неа.

³⁰Никој не смее да ја земе жената на таткото свој и да го открива крајот од покривката таткова.«