Read Свето Писмо (Гаврилова) 1990 Јован 1 Bible Online

Јован 1 - Свето Писмо (Гаврилова) 1990 bible

Јован 1

¹Во почетокот беше Словото, и Словото беше во Бога, и Бог беше Словото.

²Тоа во почетокот беше во Бога.

³Сѐ стана преку Него и без Него ништо не стана, што стана.

⁴Во Него имаше Живот и Животот им беше светлина на луѓето.

⁵И Светлината во темнина свети и мракот на ја опфати.

⁶Имаше еден човек по име Јован, пратен од Бога;

⁷тој дојде за сведоштво, да сведочи за Светлината, та сите да поверуваат преку него.

⁸Тој не беше Светлина, туку да сведочи за Светлината.

⁹Постоеше вистинска Светлина, Која го просветлува секој човек, што доаѓа на светов.

¹⁰Во светот беше и светот преку Него стана, но светот не Го позна.

¹¹Дојде при Своите и Своите не Го примија.

¹²А на сите што Го примија — на сите што веруваа во Неговото име — им даде можност да станат синови Божји:

¹³кои не од крв, ни од похот машка, а од Бога се родија.

¹⁴И Словото стана тело и се всели во нас, полно со благодат и вистина; и ние ја видовме Неговата слава, слава како на Единороден од Отецот.

¹⁵Јован сведочеше за Него и велеше зборувајќи: »Овој е за Кого реков: Оној, Кој иде по мене, ме испревари, оти постоеше порано од мене!«

¹⁶И од Неговата полнота ние сите примивме благодат врз благодат;

¹⁷зашто Законот беше даден преку Мојсеја, а благодатта и вистината произлегоа од Исуса Христа.

¹⁸Бога никој никогаш не Го видел; Единородниот Син, Кој е во крилото на Отецот — Он Го објави.

¹⁹И тоа е сведоштвото на Јована, кога Јудејците испратија од Ерусалим свештеници и левити за да го прашаат: »Кој си Ти?«

²⁰Тој призна и не одрече, а објави: »Не сум јас Христос.«

²¹И го прашаа: »А што си? Илија ли си ти?« Одговори: »Не сум.« »Пророк ли си?« И одговори: »Не.«

²²А тие Му рекоа: »Па кој си, за да можеме да им одговориме на оние, што нѐ испратија; што велиш за себе?«

²³Тој рече: »Јас сум глас на оној што вика во пустината: израмнете го патот на Господа,« како што вели пророкот Исаија.

²⁴А испратените беа од фарисеите;

²⁵И го запрашаа, велејќи: »Зошто тогаш крштаваш, кога не си Христос, ни Илија, ниту пророк?«

²⁶Јован им одговори и рече: »Јас крштавам со вода, но меѓу вас стои Еден, Кого вие не Го познавате.

²⁷Он е Оној што иде по мене, Кој беше пред мене, и Кому јас не сум достоен да Му ги одврзам ремењата од обувките Негови.«

²⁸Ова се случи во Витавара, отаде Јордан, каде што крштаваше Јован.

²⁹На другиот ден, Го виде Јован Исуса како доаѓа при него и рече: »Еве Го Јагнето Божјо, Кое ги зеде гревовите на светот врз Себе!

³⁰Овој е, за Кого реков: по мене иде Човек, Кој пред мене беше, оти постоеше порано од мене.

³¹Јас не Го познавав, но дојдов да крштавам со вода, за да биде Он објавен на Израилот.«

³²И сведочеше Јован, велејќи: »Го видов Духот да слегува од небото како гулаб и остана над Него.

³³Јас не Го познавав, но Оној, што ме прати да крштавам со вода, ми рече: ‚Врз Кого видиш да слегува Духот и да останува над Него, Тој е, Кој ќе крштава со Дух Свети.‘

³⁴И јас видов и посведочив, дека е Овој Син Божји.«

³⁵А на другиот ден, пак, стоеше Јован и двајца од неговите ученици.

³⁶И штом Го виде Исуса да врви, рече: »Еве Го Јагнето Божјо!«

³⁷Кога ги чуја од него тие зборови, обата ученика отидоа по Исуса.

³⁸А Исус, кога се сврти и виде дека одат по Него, им рече: »Што барате?« Тие Му одговорија: »Рави (што значи — Учителе) каде живееш?«

³⁹Им рече: »Дојдете и видете!« Тие отидоа и видоа каде живее; и останаа тој ден при Него. Беше околу десеттиот час.

⁴⁰А еден од двајцата, што беа чуле за Исуса и беа тргнале по Него, беше Андреј братот на Симона Петра.

⁴¹Тој прв го најде брата си Симона и му рече: »Го најдовме Месија, кое значи: Христос!«

⁴²И го одведе при Исуса. А Исус, кога го погледа, му рече: »Ти си Симон, син Јонин; ти ќе се наречеш Кифа, што значи: Петар — камен.«

⁴³На другиот ден Исус намисли да отиде во Галилеја и го најде Филипа, па му рече: »Врви по Мене!«

⁴⁴И Филип беше од Витсаида, од градот на Андреја и Петра.

⁴⁵Филип го најде Натанаила и му рече: »Го најдовме Исуса, синот Јосифов од Назарет, за Кого пишуваше Мојсеј во Законот, и Пророците!«

⁴⁶А Натанаил му рече: »Може ли нешто добро да излезе од Назарет?« Филип му одговори: »Дојди и види!«

⁴⁷Исус, пак, кога го виде Натанаила да иде при Него, рече: »Еве вистински Израилец, во кого нема лукавство.«

⁴⁸Натанаил Му рече: »Од каде ме познаваш?« Исус му одговори и рече: »Уште пред да те повика Филип, кога беше под смоквата, Јас те видов.«

⁴⁹Му одговори Натанаил и рече: »Рави! Ти си Син Божји, Ти си Царот Израилев!«

⁵⁰А Исус, одговарајќи, му кажа: »Веруваш, оти ти реков дека те видов под смоквата; ќе видиш повеќе од ова.«

⁵¹И пак рече: »Вистина, вистина ви велам: отсега ќе го гледате небото отворено и ангелите Божји како се искачуваат и слегуваат над Синот Човечки.«