Read Свето Писмо (Гаврилова) 1990 Јован 14 Bible Online

Јован 14 - Свето Писмо (Гаврилова) 1990 bible

Јован 14

¹Да не се плаши срцето ваше; верувајте во Бога и во Мене верувајте.

²Во домот на Мојот Отец има многу места за живеење. А да немаше, Јас ќе ви кажев. Одам да ви приготвам место.

³И кога ќе отидам и ви приготвам место, пак ќе дојдам, и ќе ве земам вас при Себе за да бидете и вие каде што сум Јас.

⁴А каде одам Јас знаете, и патот го знаете.

⁵Тома Му рече: »Господи, не знаеме каде одиш; и како можеме патот да го знаеме?«

⁶Исус му рече: »Јас сум патот, вистината и животот; никој не доаѓа при Отецот, освен преку Мене.

⁷Ако Ме бевте познавале, ќе Го познававте и Мојот Отец. А отсега Го познавате, и сте Го виделе.«

⁸Филип Му рече: »Господи, покажи ни Го Отецот, и доста ни е!«

⁹Му одговори Исус: »Толку време сум со вас, и не си ли Ме познал, Филипе? Кој Ме видел Мене, Го видел Отецот, и како ти велиш: ‚Покажи ни Го Отецот?‘

¹⁰Не верувате ли дека Јас сум во Отецот, и дека Отецот е во Мене? Зборовите што ви ги кажувам, од Себе не ги зборувам; а Отецот, Кој е секогаш во Мене, Он ги врши делата.

¹¹Верувајте Ми дека Јас сум во Отецот и Отецот е во Мене. Ако ли, пак, не — тогаш верувајте во Мене заради делата.

¹²Вистина, вистина ви велам: кој верува во Мене, делата што ги вршам Јас и тој ќе ги врши, и поголеми од нив ќе врши; оти Јас си одам при Својот Отец;

¹³и што и да посакате од Отецот во Мое име, ќе ви го направам, за да се прослави Отецот во Синот.

¹⁴Ако посакате нешто во Мое име, Јас ќе го направам.

¹⁵Ако Ме љубите, пазете ги Моите заповеди.

¹⁶Јас ќе Го помолам Отецот, и Он ќе ви даде друг Утешител, за да биде со вас довека,

¹⁷Духот на вистината, Кого светот не може да Го прими, оти не Го виде, ниту Го познава; а вие Го познавате, зашто во вас е и во вас ќе биде.

¹⁸Нема да ве оставам сираци; ќе дојдам при вас.

¹⁹Уште малку и светот веќе нема да Ме гледа; а вие ќе Ме гледате, зашто Јас живеам и вие ќе живеете.

²⁰Во оној ден вие ќе разберете, дека Јас сум во Мојот Отец и вие сте во Мене, и Јас сум во вас.

²¹Кој ги има заповедите Мои и ги пази, тој е оној што Ме љуби; а кој Ме љуби Мене, возљубен ќе биде од Мојот Отец; и Јас ќе го возљубам, и ќе му се јавам Сам.«

²²Му рече Јуда, не Искариот: »Господи, што е тоа дека сакаш нам да ни се јавиш, а не на светот?«

²³Исус одговори и му рече: »Ако некој Ме љуби, ќе го пази словото Мое; и Мојот Отец ќе го возљуби, и ќе дојдеме при него и живеалиште во него ќе направиме.

²⁴Кој не Ме љуби, не го запазува словото Мое; а словото, што го слушате, не е Мое, туку на Мојот Отец, Кој Ме прати.

²⁵Ова ви го реков, бидејќи сум со вас.

²⁶А Утешителот, пак, Духот Свети, Кого што Отецот ќе Го испрати во Мое име, Он ќе ве научи на сѐ и ќе ви напомни за сѐ што сум ви зборувал.

²⁷Мир ви оставам; мирот Свој ви го давам; Јас ви го давам не како што го дава светот. Да не се плаши срцето ваше, ниту да се бои.

²⁸Чувте дека Јас ви реков: ‚Одам од вас и пак ќе дојдам при вас.‘ Но ако Ме љубевте Мене, ќе се зарадувавте што реков: одам при Мојот Отец; зашто Мојот Отец е поголем од Мене.

²⁹И сега ви кажав, уште пред да се изврши, та кога ќе се изврши, да поверувате.

³⁰Нема веќе многу да зборувам со вас, оти иде кнезот од овој свет, и во Мене тој нема ништо.

³¹Но за да разбере светот дека Го љубам Отецот и, како што Ми заповеда Отецот, така и правам. Станете да си одиме одовде!«