Read Свето Писмо (Гаврилова) 1990 Јован 17 Bible Online

Јован 17 - Свето Писмо (Гаврилова) 1990 bible

Јован 17

¹Ова го кажа Исус, па ги подигна очите Свои кон небото и рече: »Оче, дојде часот: прослави Го Својот Син, за да Те прослави и Синот Твој,

²како што си Му дал власт над секое тело, та преку сѐ што си Му дал, да им даде живот вечен.

³А животот вечен е тоа, да Те познаат Тебе Единиот вистински Бог, и испратениот од Тебе Исуса Христа.

⁴Јас Те прославив на Земјата; го извршив делото, што си Ми го дал да го извршам.

⁵И сега, прослави Ме Ти, Оче, во Тебе Самиот, со славата што ја имав во Тебе, уште светот пред да настане.

⁶Го јавив името Твое на луѓето, што си Ми ги дал од светот; тие беа Твои, и Ти Ми ги даде, и го запазија Твоето слово.

⁷Сега разбраа дека сѐ, што си Ми дал, е од Тебе;

⁸зашто зборовите, што си Ми ги дал, им ги предадов, и тие ги примија и разбраа навистина, оти од Тебе сум излегол, и поверуваа дека Ти си Ме пратил.

⁹Јас за нив се молам; не се молам за сиот свет, туку за оние што си Ми ги дал, зашто се Твои.

¹⁰И сѐ Мое е Твое, и Твоето — Мое, и се прославив во нив.

¹¹Веќе не сум во светот, но тие се во светот, а Јас идам при Тебе. Оче Свети, запази ги во Твоето име оние, што си Ми ги дал, за да бидат едно, како што сме и Ние.

¹²Додека бев со нив во светот, Јас ги пазев во Твоето име; оние, што си Ми ги дал, ги зачував, и никој од нив не погина, освен погибелниот син, за да се исполни Писмото.

¹³А сега идам при Тебе, и ова му го кажувам на светот, за да ја имаат во себе Мојата радост полна.

¹⁴Јас им го предадов Твоето слово, и светот ги замрази, зашто тие не се од светот, како и Јас што не сум од него.

¹⁵Не се молам да ги земеш од светот, туку да ги запазиш од злото.

¹⁶Тие не се од светот, како и Јас што не сум од него.

¹⁷Освети ги со Својата вистина. Твоето слово е вистина.

¹⁸Како Ти Мене што Ме прати во светот, и Јас ги пратив во светот.

¹⁹И за нив Јас се посветувам, та и тие да бидат осветени преку вистината.

²⁰Но не се молам само за нив, туку и за оние, што по нивните зборови ќе поверуваат во Мене,

²¹за да бидат сите едно, како што си Ти, Оче, во Мене, и Јас во Тебе; па така и тие да бидат во Нас едно, и да поверува светот дека Ти си Ме пратил.

²²И славата што си Ми ја дал, ним им ја дадов, за да бидат едно, како што сме Ние.

²³Јас сум во нив и тие се во Мене, за да бидат во сѐ едно, и да узнае светот дека Ти си Ме пратил, и нив си ги возљубил, како Мене што Ме возљуби.

²⁴Оче, сакам и оние што си Ми ги дал да бидат со Мене, каде што сум Јас, за да ја гледаат Мојата слава што си Ми ја дал, оти Ме возљуби уште пред да се создаде светот.

²⁵Оче Праведни, светот не Те позна, Јас Те познав; и овие познаа дека Ти си Ме пратил;

²⁶и им го објавив името Твое, и ќе го известувам, та љубовта, со која Ме возљуби Ти, да биде во нив, и Јас во нив.«