Read Свето Писмо (Гаврилова) 1990 Јован 2 Bible Online

Јован 2 - Свето Писмо (Гаврилова) 1990 bible

Јован 2

¹На третиот ден имаше свадба во Кана Галилејска, и мајката на Исуса беше таму.

²Поканет беше исто така на свадбата и Исус, и учениците Негови.

³А кога приврши виното, Му рече мајка Му на Исуса: »Немаат вино.«

⁴Исус ѝ рече: »Што бараш од Мене, жено? Уште не дошол Мојот час.«

⁵Но мајка Му Негова им рече на слугите: »Сѐ што ќе ви рече, направете!«

⁶А таму имаше шест камени садови за вода, поставени за миење, според јудејскиот обичај, што собираа по две до три мери.

⁷А Исус им рече: »Наполнете ги садовите со вода!« И тие ги наполнија догоре.

⁸Па им кажа: »Нацрпете сега и однесете му на старосватот!« И му однесоа.

⁹И кога вкуси старосватот од виното, што беше станало од вода — а тој не знаеше од каде е, но слугите, што ја беа донеле водата, знаеја, и го повика младоженецот,

¹⁰и му рече: »Секој човек најнапред го изнесува доброто вино, а, кога ќе се поднапијат гостите, тогаш полошото; но ти си го зачувал доброто вино за сега.«

¹¹Така направи Исус почеток на Своите чудеса во Кана Галилејска и ја покажа славата Своја; и учениците Негови поверуваа во Него.

¹²Потоа слезе во Капернаум, Он и мајка Му, и браќата Негови, и учениците Негови; и таму останаа неколку дена.

¹³Се приближуваше Пасха јудејска, и Исус се искачи во Ерусалим;

¹⁴и ги затече во храмот оние што продаваа волови, овци и гулаби, и менувачите на пари — како седат.

¹⁵И кога направи бич од врвци, ги истера од храмот сите, и овците и воловите; а на менувачите им ги растури парите и ги испреврти масите;

¹⁶па им рече на оние што продаваа гулаби: »Носете го тоа одовде, и од домот на Мојот Отец немојте да правите дом за тргување!«

¹⁷Учениците, пак, Негови тогаш се сетија дека е напишано: »Ревноста за Твојот Дом Ме изеде.«

¹⁸А Јудејците одговорија и Му рекоа: »Со каков знак ќе ни докажеш дека можеш да го правиш тоа?«

¹⁹И им одговори Исус и рече: »Урнете го овој храм и за три дена ќе го подигнам.«

²⁰А Јудејците рекоа: »Овој храм е граден четириесет и шест години, а Ти за три дена ли ќе го подигнеш?«

²¹Но Он говореше за храмот на Своето тело.

²²А кога воскресна од мртвите, се сетија учениците Негови дека за ова беше говорел, и поверуваа на Писмото и на зборот, што го беше рекол Исус.

²³И кога беше во Ерусалим на празникот Пасха, мнозина, гледајќи ги чудесата Негови, што ги вршеше, поверуваа во Неговото име.

²⁴Но Сам Исус не им се доверуваше, оти ги познаваше сите,

²⁵и немаше потреба никој да Му сведочи за човекот, бидејќи Сам знаеше, што има во човекот.