Read Свето Писмо (Гаврилова) 1990 Јован 7 Bible Online

Јован 7 - Свето Писмо (Гаврилова) 1990 bible

Јован 7

¹Потоа одеше Исус по Галилеја, зашто нејќеше да оди во Јудеја, оти Јудејците сакаа да Го убијат.

²Се приближуваше, пак, јудејскиот празник — Правење сеници.

³Тогаш браќата Негови Му рекоа: »Излези одовде и отиди во Јудеја, та и учениците Твои да ги видат делата што ги вршиш.

⁴Оти никој не прави нешто тајно, кога и сам сака да се прочуе. Ако Ти ги вршиш овие работи, тогаш покажи се пред светот.«

⁵Зашто и браќата Негови не веруваа во Него.

⁶А на тоа Исус им одговори: »Моето време уште не е дојдено, а за вас времето е секогаш годно.

⁷Светот вас не може да ве мрази, а Мене Ме мрази, оти Јас сведочам за него, дека делата му се лоши.

⁸Вие отидете на овој празник; Јас нема да излезам на празникот, зашто времето Мое уште не се исполнило.«

⁹Откако го рече тоа, остана во Галилеја.

¹⁰Но, штом отидоа браќата Негови, отиде на празникот и Он, но не јавно, туку некако тајно.

¹¹А Јудејците Го бараа на празникот, и велеа: »Каде е Оној?«

¹²И многу расправии имаше во народот за Него: едни зборуваа дека е добар; а други велеа: »Не, туку го заблудува народот.«

¹³Но никој не зборуваше за Него отворено, поради стравот од Јудејците.

¹⁴А кога се преполови празникот, влезе Исус во храмот и поучуваше.

¹⁵И се чудеа Јудејците, велејќи: »Како ги познава Овој Книгите, кога не учел?«

¹⁶Тогаш им одговори Исус и рече: »Учењето Мое не е Мое, а на Оној што Ме прати;

¹⁷и ако некој сака да ја врши волјата Негова, ќе разбере дали е ова учење од Бога, или Јас Сам од Себе зборувам.

¹⁸Кој говори сам од себе, тој ја бара својата слава; а кој ја бара славата на Оној што Го пратил, Он е вистина и во Него нема неправда.

¹⁹Зар не ви даде Мојсеј Закон? Но никој од вас не го исполнува Законот. Зошто сакате да Ме убиете?«

²⁰Народот одговори и рече: »Бес ли Те фатил? Кој сака да Те убие?«

²¹Одговори Исус и им рече: »Едно дело извршив и сите се чудите.

²²Мојсеј ви даде обрезание, макар што тоа не е од Мојсеја, а од татковците — и вие во саботен ден го обрезувате човекот.

²³Ако човек се обрезува во сабота, за да не се наруши Законот Мојсеев, на Мене ли се гневите што цел човек направив здрав во сабота?

²⁴Не судете според надворешноста, туку судете со праведен суд!«

²⁵Тогаш некои од Ерусалим рекоа: »Не е ли Овој, Кого Го бараат да Го убијат?

²⁶Ете, јавно говори и ништо не Му велат; да не се увериле и началниците, дека е Он навистина Христос?

²⁷Но Овој Го знаеме од каде е, а кога ќе дојде Христос, никој не ќе знае од каде е.«

²⁸Тогаш Исус, поучувајќи во храмот, извика гласно и рече: »И Мене Ме познавате, и знаете од каде сум; но Сам од Себе не дојдов, а има еден Вистински, Кој Ме пратил и Кого вие не Го познавате.

²⁹Јас, пак, Го знам, оти сум од Него и Он Ме прати.«

³⁰Тогаш сакаа да Го фатат. Но никој не кладе рака на Него, бидејќи уште не беше дошол часот Негов.

³¹И мнозина од народот поверуваа во Него и велеа: »Кога ќе дојде Христос, зар ќе направи поголеми чудеса отколку што направи Овој?«

³²Чуја фарисеите дека народот така зборува за Него, па тие и првосвештениците испратија слуги да Го фатат.

³³Тогаш Исус им рече: »Уште малку време сум со вас, а потоа ќе отидам при Оној, Кој Ме пратил.

³⁴Ќе Ме барате и нема да Ме најдете; и каде што ќе бидам Јас, вие не ќе можете да дојдете.«

³⁵А Јудејците си рекоа помеѓу себе: »Каде ќе оди Овој, за да не можеме да Го најдеме? Да не сака да оди при расеаните меѓу Елините, па и Елините да ги поучува?

³⁶Што значат овие зборови: ‚Ќе Ме барате и не ќе Ме најдете;‘ и ‚Каде што ќе бидам Јас, вие не ќе можете да дојдете?‘«

³⁷А во последниот голем ден од празникот застана Исус и извика со висок глас, велејќи: »Кој е жеден, нека дојде при Мене да пие!

³⁸Кој верува во Мене, од неговата утроба, како што е речено во Писмото, ќе потечат реки од жива вода.«

³⁹А ова го рече за Духот, Кого што ќе Го примат оние, кои веруваат во Него; оти Светиот Дух уште не им беше даден, бидејќи Исус уште не беше прославен.

⁴⁰А мнозина од народот, кога ги чуја овие зборови, рекоа: »Навистина, Овој е пророк!«

⁴¹Други велеа: »Овој е Христос.« А некои рекоа: »Зар од Галилеја ќе дојде Христос?

⁴²Не е ли речено во Писмото: дека Христос ќе дојде од семето Давидово и од грачето Витлеем, од каде што беше Давид?«

⁴³И така настана во народот расправија за Него.

⁴⁴А некои од нив сакаа да Го фатат, но никој не стави рака врз Него.

⁴⁵Дојдоа, пак, слугите кај првосвештениците и фарисеите и овие им рекоа: »Зошто не Го доведовте?«

⁴⁶А слугите одговорија: »Никогаш човек не говорел така како Овој Човек.«

⁴⁷Тогаш им одговорија фарисеите: »Да не се прелагавте и вие?

⁴⁸Поверувал ли некој од началниците и фарисеите во Него?

⁴⁹Но овој народ, што не го знае Законот, е проклет.«

⁵⁰Никодим, пак, кој беше отишол при Него ноќе, а беше еден од нив, им рече:

⁵¹Осудува ли нашиот Закон човек, дури најнапред не го сослушаат и не узнаат што прави?

⁵²А тие му одговорија и рекоа: »Да не си и ти од Галилеја? Испитај и види дека пророк од Галилеја не се јавил.«

⁵³И секој си отиде во својот дом.