Read Свето Писмо (Гаврилова) 1990 Дела 11 Bible Online

Дела 11 - Свето Писмо (Гаврилова) 1990 bible

Дела 11

¹Апостолите и браќата, кои беа во Јудеја, чуја дека и незнабошците го примиле словото Божјо.

²И кога Петар влезе во Ерусалим, обрезаните, што беа со него го укорија,

³велејќи: »Ти си бил при необрезаните луѓе и си јал со нив.«

⁴А Петар почна да им расправа за сѐ по ред, велејќи:

⁵»Јас бев во градот Јопија, и, додека се молев, се занесов и ете видение: од небото слегуваше некаков сад, како некое платниште, врзано за четирите краишта, и пријде дури до мене.

⁶Откако погледав во него и го разгледав, видов четвороножни земни животни, и ѕверови, и лазачи, и птици небески.

⁷И чув глас што ми зборуваше: ‚Стани, Петре, заколи и јади!‘

⁸Јас пак реков: ‚Не, Господи, зашто ништо погано или нечисто никогаш не влегло во устата моја.‘

⁹А гласот од небесата повторно проговори и рече: ‚Она, што Бог го очистил, ти не го погани!‘

¹⁰Тоа се повтори трипати; и пак се крена на небото.

¹¹И ете, во тој час, пред куќата, во која живеев јас, застанаа три човека, испратени при мене од Ќесарија.

¹²А Духот ми рече да појдам со нив, не двоумејќи се. Со мене дојдоа и овие шестмина браќа, и влеговме во куќата на оној човек.

¹³Тој ни кажа како видел ангел во куќата своја, кој застанал и му рекол: ‚Прати во Јопија луѓе и повикај го Симона, наречен Петар.

¹⁴Тој ќе ти каже зборови, преку кои ќе се спасиш ти и целиот твој дом.‘

¹⁵И кога почнав јас да зборувам, над нив слезе Духот Свети, како и над нас во почетокот.

¹⁶Тогаш се сетив на зборовите Господови, како што зборуваше: ‚Јован крштаваше со вода, а вие ќе бидете крстени со Дух Свети.‘

¹⁷Кога, пак, Бог им даде еднаков дар, како и нам, кои поверувавме во Господа Исуса Христа, тогаш кој сум јас да Му се воспротивам на Бога.«

¹⁸Откако го ислушаа тоа, тие се успокоија и Го прославуваа Бога, велејќи: »Значи, и на незнабошците Бог им даде покајание за живот.«

¹⁹А оние, што се беа распрснале поради гонењето заради убиството на Стефана, стигнаа дури до Феникија, Кипар и Антиохија, не проповедајќи го словото никому освен на Јудејците.

²⁰А некои од нив — Кипрани и Киринејци, штом влегоа во Антиохија, им зборуваа на Елините, проповедајќи им го Евангелието на Господа Исуса.

²¹И раката Господова беше со нив, та голем број луѓе поверуваа и се обрнаа кон Господа.

²²И дојде слух за нив до ушите на црквата ерусалимска; и го испратија Варнава да отиде во Антиохија.

²³А тој, кога пристигна, ја виде благодатта Господова, се зарадува, и со искрено срце ги молеше да пребиваат во Господа;

²⁴оти тој беше човек добар и исполнет со Дух Свети и вера. И многу народ се присоедини кон Господа.

²⁵Тогаш, пак, Варнава отиде во Тарс да го бара Савла; и откако го најде, го доведе во Антиохија.

²⁶И цела година тие се собираа во црквата и поучуваа многу народ; и најнапред во Антиохија ги нарекоа учениците христијани.

²⁷А во тие дни слегнаа од Ерусалим во Антиохија и пророци.

²⁸И еден од нив, по име Агав, пророче преку Духот дека по целата вселена ќе настане голем глад; а таков и настана во времето на ќесарот Клаудиј.

²⁹Тогаш учениците решија, секој, со што располагаше, да испрати помош на браќата, што живееја во Јудеја;

³⁰и тоа го направија, откако го пратија собраното до старешините преку Варнава и Савла.