Read Свето Писмо (Гаврилова) 1990 Дела 12 Bible Online

Дела 12 - Свето Писмо (Гаврилова) 1990 bible

Дела 12

¹Во тоа време цар Ирод кладе рака на некои од Црквата, за да им направи зло,

²и со меч го уби Јакова, братот Јованов.

³А кога виде, дека тоа им се свиде на Јудејците, го фати и Петра, а тогаш беа дните на Бесквасници.

⁴И, како го задржа, го фрли в затвор и го предаде на четири четворки војници да го пазат, а со мисла веднаш по Пасхата да го изведе пред народот.

⁵И така, Петар беше пазен во затворот, а Црквата постојано Му се молеше на Бога за него.

⁶А кога Ирод сакаше да го изведе, ноќта спроти тој ден, Петар спиеше меѓу двајца војници, окован во две вериги, а стражарите пред портата пазеа на затворот.

⁷И, ете, ангел Господов застана, и светлина блесна во затворот. Ангелот го потчукна Петра по ребрата и го разбуди, па му рече: »Стани брзо!« И веригите му паднаа од рацете негови.

⁸Тогаш ангелот му рече: »Опаши се и обуј си ги чевлите!« Така и направи. И пак му рече: »Облечи ги алиштата свои и врви по мене!«

⁹И излезе и тргна по него, а не знаеше дека тоа, што го прави ангелот, е вистина, туку си мислеше оти привид гледа.

¹⁰Откако ја изминаа првата и втората стража, дојдоа до железната порта, што водеше кон градот, а таа им се отвори сама; тие излегоа и преминаа преку една улица, и во тој час ангелот го снема.

¹¹Тогаш Петар, откако дојде на себеси, си рече: »Сега разбрав навистина дека Господ го пратил Својот ангел да ме избави од рацете Иродови и од сѐ, што очекуваше јудејскиот народ.«

¹²Откако се размисли, тој се упати кон куќата на Марија, мајката на Јована, наречен Марко, каде што беа собрани многумина и се молеа.

¹³А кога Петар чукна на портата, пристапи да наслушнува слугинката по име Рода.

¹⁴И, откако го позна гласот на Петра, таа од радост не ја отвори портата, туку се втрчна и јави дека Петар стои пред портата.

¹⁵А тие ѝ рекоа: »Луда ли си ти?« Но таа потврдуваше дека тоа е така. А тие велеа: »Тоа е неговиот ангел.«

¹⁶Петар, пак, постојано чукаше. А кога му отворија, го видоа и се зачудија многу.

¹⁷А тој им мавна со раката да молчат, потоа им раскажа како Господ го извел од затворот, и рече: »Соопштете му за ова на Јакова и на браќата!« И, откако излезе, отиде на друго место.

¹⁸Утредента меѓу војниците стана голем смут за тоа што станало со Петра.

¹⁹А кога Ирод го побара и не го најде, ги распраша стражарите, и заповеда да ги казнат. Потоа тој слезе од Јудеја во Ќесарија, и таму живееше.

²⁰Ирод беше гневен на Тирците и Сидонците. Но тие се договорија и дојдоа при него еднодушни, и, откако го придобија на своја страна Власта, царевиот собар, побараа мир, оти нивните земји добиваа храна од неговото царство.

²¹Во определениот ден Ирод се облече во царска облека и, како седна на престолот, им зборуваше.

²²А народот викаше: »Ова е глас Божји, а не човечки.«

²³Но наеднаш го порази ангел Господов, зашто не Му воздаде слава на Бога. И, изеден од црви, тој умре.

²⁴А словото Божјо растеше и се распространуваше.

²⁵Варнава и Савле, откако ја предадоа помошта, се вратија од Ерусалим во Антиохија, а го зедоа со себе и Јована, наречен Марко.