Read Свето Писмо (Гаврилова) 1990 Дела 24 Bible Online

Дела 24 - Свето Писмо (Гаврилова) 1990 bible

Дела 24

¹По пет дена слегна првосвештеникот Ананија со старешините и со некој си ретор Тертил; излегоа пред намесникот, обвинувајќи го Павла.

²А кога го повикаа Павла, Тертил почна да го обвинува, велејќи:

³Секогаш и насекаде со голема благодарност признаваме дека преку тебе, многупочитувани Феликсе, кај нас има полн мир, а преку грижите твои — на овој народ му се дели вистинска правда.

⁴Но, за да не ти одземам многу време, те молам да нѐ ислушаш накратко со твојата кроткост.

⁵Бидејќи најдовме дека овој човек е зараза и дека крева бунтови против сите Јудејци по вселената и дека е водач на назарејската ерес,

⁶кој се обиде дури и храмот да го оскверни, затоа ние го фативме и сакавме да му судиме според нашиот Закон;

⁷но заповедникот Лисиј дојде и со голема сила го истргна од рацете наши, и го испрати при тебе,

⁸откако заповеда и ние, неговите обвинители, да дојдеме при тебе. Ти ќе можеш сам да го испиташ и од него да узнаеш во што го обвинуваме ние.

⁹А и Јудејците потврдуваа дека е така.

¹⁰Намесникот му даде знак на Павла да зборува, а тој одговори: »Бидејќи знам дека од многу години си му судија на овој народ, тоа со послободно срце ќе зборувам во моја заштита.

¹¹Ти можеш да дознаеш дека нема повеќе од дванаесет дена откако се искачив во Ерусалим на поклонение.

¹²И ни во храмот ме најдоа некому да зборувам, или бунт да кревам меѓу народот, ни по зборниците, ниту, пак, во градот.

¹³Ниту, пак, тие можат да го докажат она што сега ти зборуваат за мене.

¹⁴Но ти признавам, дека според учењето, кое тие го наречуваат ерес, Му служам на Бога и на отците наши, дека верувам во сѐ што е напишано во Законот и во Пророците,

¹⁵и дека се надевам на Бога, оти ќе има воскресение на мртвите, на праведните и на неправедните, кое и тие сами го очекуваат.

¹⁶А за тоа и сам се грижам секогаш да имам чиста совест пред Бога и пред луѓето.

¹⁷По многу години дојдов да му донесам на мојот народ милостина и приноси.

¹⁸Тогаш, кога се бев очистил, ме најдоа во храмот, ни со народ, ниту со шум,

¹⁹некои азиски Јудејци, кои требаше да се претстават пред тебе и да ме обвинат, ако имаат нешто против мене.

²⁰Или, пак, тие сами да кажат дали во мене нашле некаква неправда, кога се бев јавил пред Синедрионот, —

²¹освен само овие зборови, кои, застанат пред нив, гласно ги изговорив: ‚Заради воскресението на мртвите ме судите вие денес.‘«

²²Кога го чу тоа Феликс, тој го одложи делото, бидејќи добро знаеше за тоа учење, и рече: »Ќе го разгледам делото кога ќе дојде заповедникот Лисиј.«

²³И му заповеда на стотникот да го пази Павла, но полабаво, и да не запира никого од неговите блиски да му служат, или да доаѓаат при него.

²⁴По неколку дни дојде Феликс со жената своја Друзила која беше Јудејка, та го повика Павла и слушаше од него за верата во Христа Исуса.

²⁵А кога Павле зборуваше за правда, за воздржување и за идниот суд, Феликс се уплаши и одговори: »Сега оди си, а кога ќе најдам време, ќе те повикам.«

²⁶При ова се надеваше дека Павле ќе му даде пари за да го пушти; затоа често го повикуваше и разговараше со него.

²⁷Но кога изминаа две години, Феликса го замени Порциј Фест. И бидејќи сакаше да им угоди на Јудејците, Феликс го остави Павла во окови.