Read Свето Писмо (Гаврилова) 1990 Римјаните 1 Bible Online

Римјаните 1 - Свето Писмо (Гаврилова) 1990 bible

Римјаните 1

¹Павле, слуга на Исуса Христа, повикан за апостол, избран за Благовестието Божјо,

²кое Он уште порано го беше ветил преку светите пророци, во светите Писма,

³за Својот Син, по тело роден од семето Давидово,

⁴посведочен како Син Божји во силата по Духот на осветувањето, преку воскресението од мртвите на Исуса Христа, нашиот Господ,

⁵преку Кого добивме благодат и апостолство за послушност кон верата на сите народи во Негово име,

⁶меѓу кои сте и вие, повиканите од Исуса Христа,

⁷благодат и мир од Бога Отецот наш и Господа Исуса Христа на сите вас, што сте во Рим, возљубени од Бога, наречени светии.

⁸Пред сѐ, Му благодарам на својот Бог, благовестувајќи за сите вас, оти за вашата вера се зборува по целиот свет;

⁹Бог, Кому Му служам со својот дух, благовестувајќи за Неговиот Син, сведок ми е дека постојано си спомнувам за вас

¹⁰и секогаш во молитвите свои се молам, та со Божја волја некако да ми се даде да дојдам при вас,

¹¹зашто копнеам да ве видам, па да ви предадам некој духовен дар за вашето зацврстување,

¹²односно, кога ќе бидам меѓу вас, заедно да се утешиме преку општата вера — вашата и мојата.

¹³Само не сакам, браќа, да ви биде непознато дека многупати бев на мисла да дојдам при вас, но бев попречуван дури досега, та да имам некој плод и меѓу вас, како и меѓу другите народи.

¹⁴Задолжен сум кон Елините и варварите, кон мудрите и кон неразумните.

¹⁵Па, во колку од мене зависи, готов сум и вам во Рим да ви го проповедам Евангелието.

¹⁶Зашто јас не се срамувам од Евангелието на Христа, бидејќи тоа е сила Божја за спасението на секој што верува, прво на Јудеец, а потоа и на Елин.

¹⁷Бидејќи во него се открива правдата Божја од вера во вера, како што е напишано: »Праведникот преку вера ќе живее«.

¹⁸Оти гневот Божји се открива од небото на секоја нечесност и неправда на луѓето, кои вистината ја држат во неправда;

¹⁹така што она, кое може да се знае за Бога, ним им е познато, бидејќи Бог тоа им го откри.

²⁰Оти она, што е во Него невидливо, односно вечната Негова сила и Божеството, се гледа уште од создавањето на светот, гледани според нивните созданија, па така тие немаат изговор.

²¹Зашто, кога Го познаа Бога, тие не Го прославија како Бог, ниту, пак, Му благодарија, туку се заблудија во своите помисли, и нивното неразумно срце им се помрачи;

²²наречувајќи се себе мудри, тие обезумија,

²³и славата на вечниот Бог ја изменија во облик на смртен човек, на птици, на четвороножни животни и на лазачи, —

²⁴затоа и Бог, според желбите на срцата нивни, ги предаде на нечистотата, за да се бесчестат телата нивни во самите себе.

²⁵Тие ја заменија вистината Божја со лага и му се поклонија и му служеа на созданието повеќе отколку на Создателот, Кој е благословен во сите векови. Амин!

²⁶Затоа Бог ги предаде на срамни страсти: жените нивни природните потреби ги заменија со противприродни;

²⁷и мажите исто така; оставајќи го природното зближување со женскиот пол, се распалија со желби еден кон друг, и вршеа срамни работи мажи со мажи, добивајќи отплата каква што одговараше на нивната заблуда.

²⁸И бидејќи не се обидоа да Го имаат Бога во разумот свој, тоа Бог ги предаде на изопачен ум — да го прават она, што не прилега;

²⁹бидејќи исполнети со секаква неправда, блудство, лукавство, користољубивост, злоба; полни со завист, убиства, расправии, измами, лоши нарави;

³⁰оговарачи, клеветници, богомрасци, силеџии, фалбаџии, горди, измислувачи на зло, непослушни кон родителите,

³¹неразумни, неверни, недружељубиви, непомирливи, немилостиви.

³²Тие, иако ја знаеја правдата Божја дека оние, што вршат такви дела, заслужуваат смрт, сепак не само што ги вршат, туку се благонаклони и кон оние што ги вршат.