Read Свето Писмо (Гаврилова) 1990 Римјаните 15 Bible Online

Римјаните 15 - Свето Писмо (Гаврилова) 1990 bible

Римјаните 15

¹Ние силните должни сме да ги поднесуваме немоштите на слабите, и да не угодуваме на себеси:

²секој од вас должен е на својот ближен да му угодува во доброто за поука.

³Оти и Христос не угоди на Себеси, па како што е напишано: »Хулењата на оние, што Те хулеа, паѓаа врз Мене«.

⁴А сѐ, што беше порано напишано, за наша поука беше напишано, та преку трпението и преку утехата од Писмата да имаме надеж.

⁵А и Бог на трпението и утехата да ви даде да бидете во едномислие помеѓу себе, според примерот на Христа Исуса,

⁶та еднодушно и со една уста да Го славите Бога и Отецот на нашиот Господ Исус Христос.

⁷Затоа примајте се еден со друг, како што и Христос ве прими за славата Божја.

⁸Но велам дека Исус Христос стана слуга на обрезанието поради Божјата вистина, за да ги потврди ветувањата, дадени на татковците,

⁹а, пак, незнабошците да Го прослават Бога за Неговата милосрдност, како што е напишано: »Затоа Те прославувам, Господи, меѓу незнабошците и ќе Го воспеам Твоето име«.

¹⁰И пак е речено: »Развеселете се, незнабошци, со Неговиот народ!«

¹¹И пак: »Фалете Го Господа сите незнабошци, и прославете Го, сите народи!«

¹²Исаија, исто така вели: »Ќе постои коренот Јесеев и Издигнатиот од него ќе владее над народите; на Него ќе се надеваат народите.«

¹³А Бог на надежта нека ве исполни со секаква радост и мир во верата, та преку силата на Светиот Дух вашата надеж да се преумножува.

¹⁴И јас сум уверен за вас, браќа мои, дека и вие сте полни со благост, исполнети со секакво разбирање, та можете да се поучувате еден со друг.

¹⁵Но ви пишав, браќа, нешто малку послободно, за да ви напомнам за дадената ми од Бога благодат,

¹⁶за да Му бидам слуга на Исуса Христа меѓу незнабошците и свештенодејствено да го извршувам Божјото Благовестие, та приносот од незнабошците, осветен од Светиот Дух, да биде благопријатен.

¹⁷И така, со тоа можам да се пофалам во Исуса Христа кај Бога,

¹⁸оти не смеам да речам ништо, што не го извршил Христос преку Мене, за да станат и незнабошците послушни на верата, со слово и дело,

¹⁹со силата на знаци и чуда, со силата на Божјиот Дух, така што Благовестието Христово го распространив од Ерусалим и неговата околина дури до Илирик.

²⁰И така, се погрижив да го проповедам Евангелието не таму, каде што името Христово беше веќе извесно, за да не ѕидам врз туѓ темел,

²¹а како што е и напишано: »На оние, на кои не им се јави за Него, ќе видат; и оние што не беа чуле, ќе узнаат«.

²²Токму тоа многупати ме попречуваше да дојдам при вас.

²³Сега, пак, бидејќи немам веќе такво место во овие земји, а од многу години наваму копнеев да дојдам при вас,

²⁴ако тргнам за Шпанија, ќе дојдам кај вас. Оти, преминувајќи таму, се надевам да ве видам и натаму вие да ме испратите, откако најнапред се порадувам на вас.

²⁵А сега одам во Ерусалим, за да им послужам на светиите,

²⁶зашто Македонија и Ахаја благоволија да дадат некаков принос за бедните светии во Ерусалим.

²⁷Благоволија, па и должни им се. Бидејќи, ако незнабошците станаа соучесници во нивните духовни блага, тоа тие се должни и ним да им служат со материјални блага.

²⁸А откако ќе го направам ова и им го запечатам овој плод, низ вашите места ќе заминам за Шпанија.

²⁹А знам дека, кога ќе дојдам при вас, ќе дојдам со полн благослов на Христовото Евангелие.

³⁰Браќа, ве молам поради нашиот Господ Исус Христос и поради љубовта на Духот, помагајте ми со своите молитви кон Бога за мене,

³¹за да се избавам од оние што не веруваат, кои се во Јудеја, и службата моја во Ерусалим да им биде благопријатна на светиите:

³²та радосен да дојдам при вас со Божјата волја и да се успокојам со вас.

³³А Бог на мирот нека биде со сите вас. Амин!