Read Свето Писмо (Гаврилова) 1990 Римјаните 16 Bible Online

Римјаните 16 - Свето Писмо (Гаврилова) 1990 bible

Римјаните 16

¹Ви ја препорачувам Фива, нашата сестра, која е слугинка при црквата во Кенхреа:

²примете ја во Господа, како што им прилега на светии, и помогнете ѝ во она, во што ќе има потреба од вас, бидејќи и таа беше помошница на мнозина и на мене самиот.

³Поздравете ги Прискила и Акила, моите сотрудници во Христа Исуса,

⁴кои за мојата душа ја положија својата глава; ним не само јас им благодарам, туку и сите цркви од незнабошците и нивната домашна црква.

⁵Поздравете го мојот возљубен Епенет, кој е првенец во Христа во Ахаја.

⁶Поздравете ја Маријам, која многу се грижеше за нас.

⁷Поздравете ги Андроника и Јунија, моите сродници и созатвореници, кои се прочуени меѓу апостолите и кои уште пред мене поверуваа во Христа.

⁸Поздравете ми го саканиот во Господа Амплија!

⁹Поздравете го нашиот сотрудник во Христа Урбана и саканиот Стахија!

¹⁰Поздравете го испитаниот во Христа Апелија! Поздравете ги верните од домот Аристовулов!

¹¹Поздравете го мојот сродник Иродион! Поздравете ги домашните на Наркис, кои веруваат во Господа.

¹²Поздравете ги Трифена и Трифоса, кои се грижат за Господа. Поздравете ја почитуваната Персида, која многу се погрижи за Господа.

¹³Поздравете го избраниот во Господа Руф, како и неговата и моја мајка!

¹⁴Поздравете ги Асинкрита, Флегонта, Ерма, Патрова, Ермија и браќата со нив!

¹⁵Поздравете ги Филолога и Јулија, Ниреја и неговата сестра, и Олимпана и сите со нив светии!

¹⁶Поздравете се еден со друг со свет целив! Ве поздравуваат сите цркви Христови!

¹⁷Ве молам, браќа, пазете се од оние, кои предизвикуваат расцепи и соблазни против учењето, кое сте го научиле, и клонете се од нив!

¹⁸Зашто таквите не Му служат на нашиот Господ Исус Христос, туку на стомакот свој, и со слатки и ласкави зборови ги измамуваат срцата на простодушните.

¹⁹Вашата послушност во верата на сите им е позната: затоа јас се радувам за вас, но сакам да бидете мудри во доброто и прости во злото.

²⁰А Бог на мирот наскоро ќе го сотре сатаната под нозете ваши. Благодатта на нашиот Господ Исус Христос нека биде со вас. Амин!

²¹Ве поздравуваат мојот сотрудник Тимотеј, и моите сродници Луциј, Јасон и Сосипатар.

²²Ве поздравувам во Господа и јас Терциј, кој го напиша ова послание.

²³Ве поздравува Гај, мој и на целата црква домаќин. Ве поздравува Ераст, градскиот благајник и братот Кварт.

²⁴Благодатта на нашиот Господ Исус Христос нека биде со сите вас. Амин!