Read Свето Писмо (Гаврилова) 1990 Римјаните 5 Bible Online

Римјаните 5 - Свето Писмо (Гаврилова) 1990 bible

Римјаните 5

¹И така, бидејќи оправдани со верата, имаме мир со Бога, преку нашиот Господ, Исуса Христа,

²преку Кого со верата добивме и пристап кон оваа благодат, во која стоиме, и се фалиме со надежта во славата Божја.

³Но не само тоа, туку се фалиме и со маките, знаејќи, дека од маката се раѓа и трпението;

⁴од трпението, пак — искуство, а од искуството — надеж;

⁵надежта, пак, не посрамува, зашто љубовта Божја се излеа во нашите срца преку Духот Свети, Кој ни беше даден.

⁶Оти, уште кога бевме немоќни, Христос во определено време умре за безбожниците.

⁷За праведник одвај ли некој да умре; за добар, можеби, некој и да се реши да умре.

⁸Но, Бог ја докажа љубовта Своја кон нас со тоа, што Христос умре за нас, уште додека бевме грешни.

⁹Затоа сега, откако се оправдавме со крвта Негова, многу повеќе ќе се спасиме преку Него од гревот.

¹⁰Оти, ако како непријатели, се помиривме со Бога преку смртта на Неговиот Син, тогаш уште повеќе ќе се спасиме преку Неговиот живот, откако сме се помириле.

¹¹И не само тоа, туку и се фалиме со Бога преку нашиот Господ Исуса Христа, преку Кого добивме сега помирување.

¹²Затоа, како што гревот влезе во светот преку еден човек, а преку гревот — смртта, по таков начин и смртта премина на сите луѓе преку еден човек, оти сите згрешија;

¹³бидејќи и пред Законот имаше грев во светот; но гревот како таков не се смета, кога нема закон.

¹⁴Смртта, пак, царува од Адама та дури до Мојсеја и над оние што не погрешија со престапи, слични на Адамовите, кој е образ на Оној што ќе дојде.

¹⁵Но дарот не е како престапувањето. Зашто, ако преку престапувањето на еден изумреа мнозина, тогаш Божјата благодат и дарот преку благодатта на единствениот Човек, Исуса Христа, уште повеќе преизобилно ќе се излие врз мнозина.

¹⁶И дарот не е како гревот на еден што погрешил, зашто судењето за еден престап води кон осудување, а дарот — од многу престапи кон оправдување.

¹⁷Бидејќи, ако со престапувањето на еден смртта царува преку едниот, тоа многу повеќе оние, што ја примија благодатта и дарот изобилно, ќе царуваат во животот преку Единиот Исус Христос.

¹⁸И така, како што преку престапувањето на еден човек дојде осудувањето на сите луѓе, така и преку правдата на Единиот дојде оправданието за живот на сите луѓе.

¹⁹Оти, како што преку непослушноста на еден човек мнозина станаа грешни, така исто и преку послушноста на еден, мнозина ќе станат праведни.

²⁰А Законот се додаде, за да се умножи престапувањето. Каде што, пак, се умножува гревот, благодатта се јавува во голема изобилност,

²¹та, како што гревот царува, предизвикувајќи смрт, така и благодатта да се зацари со правда за живот вечен, преку Исуса Христа, нашиот Господ.