Read Свето Писмо (Гаврилова) 1990 Римјаните 6 Bible Online

Римјаните 6 - Свето Писмо (Гаврилова) 1990 bible

Римјаните 6

¹Што, пак, да речеме? Ќе останеме ли во гревот, за да се умножи благодатта? Никако!

²Ние, кои сме умреле за гревот, како ќе живееме во него уште?

³Зар не знаете дека сите ние што се крстивме во Исуса Христа, во Неговата смрт се крстивме.

⁴И така, ние се погребавме со Него преку крштавањето во смртта, та, како што Христос воскресна од мртвите преку славата на Отецот, така и ние да одиме во обновен живот.

⁵Зашто, ако сме сраснати со Него во еднаква смрт, ќе бидеме соучесници и во воскресението;

⁶знаејќи дека нашиот стар човек е распнат со Него, за да биде уништено гревовното тело, па да не бидеме веќе робови на гревот;

⁷бидејќи, кој умрел, тој се ослободил од гревот.

⁸А ако сме умреле со Христа, веруваме дека со Него и ќе живееме,

⁹знаејќи оти Христос, откако воскресна од мртвите, нема веќе да умира: смртта нема веќе власт над Него.

¹⁰Зашто ако умре Он, умрел еднаш за гревот, а што живее, за Бога живее.

¹¹Па така и вие сметајте се мртви за гревот, и живи за Бога во Христа Исуса, нашиот Господ.

¹²И гревот да не царува во вашето смртно тело, за да не им се покорувате на телесните наслади;

¹³и не дозволувајте вашите органи на гревот да станат орудија на неправдата, туку препуштете се на Бога како оживени од мртвите, а органите ваши да станат орудија на правдата.

¹⁴Гревот не треба да господари над вас, оти вие не сте под Законот, туку под благодатта.

¹⁵Па што? Да грешиме ли, бидејќи не сме под Законот, туку под благодатта? Тоа никако!

¹⁶Не знаете ли дека, кому му се предавате како робови за послушност, робови сте му на оној, кому му се покорувате: или робови на гревот, за смрт, или — на послушност за оправдание?

¹⁷Но благодарејќи Му на Бога, вие, иако бевте робови на гревот, од сѐ срце му станавте послушни на оној вид учење, на кое му се предадовте.

¹⁸Откако се ослободивте од гревот, вие станавте робови на правдата.

¹⁹Ви зборувам како човек, за вашата плотска слабост. Оти, како што ги предостававте членовите ваши да бидат робови на нечистотата и беззаконието за беззаконство, така и сега оставете ги членовите ваши да бидат робови на правдата за осветување.

²⁰Зашто, додека му бевте робови на гревот, бевте слободни од правдата.

²¹А каков плод имавте тогаш? Дела, од кои сега се срамувате, бидејќи нивниот крај е смртта.

²²Но сега, кога се ослободивте од гревот и Му станавте служители на Бога, вашиот плод е светост, а крајот — животот вечен.

²³Оти, платата, што ја дава гревот, е смрт, а дарот Божји е живот вечен во Христа Исуса, нашиот Господ.