Read Свето Писмо (Гаврилова) 1990 Римјаните 7 Bible Online

Римјаните 7 - Свето Писмо (Гаврилова) 1990 bible

Римјаните 7

¹Или, пак, не знаете, браќа, бидејќи им зборувам на такви што го познаваат Законот, дека законот има власт над човекот додека е тој жив?

²Омажената жена е поврзана преку законот со мажот, додека е тој жив: умре ли мажот, таа се ослободува од законот, кој ја сврзал со мажот.

³Затоа, ако при жив маж се омажи таа за друг маж, ќе стане прељубница; ако, пак, умре мажот, таа е слободна од Законот, и нема да биде прељубница, кога ќе се омажи за друг човек.

⁴Па така и вие, браќа мои, за Законот преку телото на Исуса Христа умревте, за да Му припаднете на Друг, Кој воскресна од мртвите, та да Му принесеме плод на Бога.

⁵Зашто, кога живеевме во телото, тогаш страстите гревовни, преку Законот, дејствуваа во органите, за да ѝ принесеме плод на смртта;

⁶но сега, кога за Законот умревме, преку кого бевме сврзани, ние се ослободивме од него, за да Му служиме на Бога со обновен дух, а не според старата буква.

⁷Што да речеме пак? Зар Законот е грев? Никако! Но јас го разбрав гревот преку Законот, оти и похотта не би ја познал, ако Законот не велеше: »Не похотствувај!«

⁸Но гревот, поведувајќи се од заповедта, предизвика во мене секаква желба; бидејќи гревот без Закон е мртов.

⁹Некогаш живеев без Закон; но кога дојде заповедта, гревот оживе.

¹⁰Јас, пак, умрев, и се покажа дека заповедта, дадена за живот, ми послужи за смрт,

¹¹оти гревот, поведувајќи се по заповедта, ме измами и преку неа ме умртви.

¹²Така, значи, Законот е свет, и заповедта света, справедлива и добра.

¹³Па така, доброто ли за мене стана смрт? Никако! Но гревот, за да се покаже дека е грев, ми предизвикува преку доброто смрт, та преку заповедта гревот да стане премногу грешен.

¹⁴Зашто знаеме дека Законот е духовен, а јас, пак, сум од тело, продадено на гревот.

¹⁵А што правам, не знам; бидејќи не го вршам она, што сакам, туку она, што го мразам, тоа го правам.

¹⁶Ако, пак, го правам она, што не го сакам, тогаш се согласувам со Законот дека е добар.

¹⁷И така, јас веќе не го правам тоа, туку гревот, што живее во мене.

¹⁸Јас знам дека во мене, односно во моето тело, не живее доброто; бидејќи желба за добро во мене има, но да го правам тоа, не наоѓам сили.

¹⁹Оти не доброто, кое го сакам, го правам, туку злото, што не го сакам, го вршам.

²⁰А штом го вршам она, што не го сакам, не го вршам веќе јас, но гревот, кој живее во мене.

²¹И така, во себеси наоѓам таков закон дека, кога сакам да го правам доброто, злото ми се наметнува.

²²Бидејќи, со својот внатрешен човек наоѓам наслада во законот Божји,

²³но во органите свои гледам друг закон, кој војува против законот на мојот ум и ме прави заробеник на гревовниот закон, кој е во моите органи.

²⁴Беден човек сум! Кој ќе ме избави од телото на оваа смрт?

²⁵Му благодарам на својот Бог преку Исуса Христа, нашиот Господ. И така, јас сам со умот свој му служам на Божјиот закон, а со телото — на гревовниот закон.