Read Свето Писмо (Гаврилова) 1990 Римјаните 8 Bible Online

Римјаните 8 - Свето Писмо (Гаврилова) 1990 bible

Римјаните 8

¹И сега нема никакво осудување за оние кои се во Исуса Христа и живеат не по телото, а по Духот,

²бидејќи Законот на Духот, кој дава живот во Христа Исуса, ме ослободи од законот на гревот и на смртта.

³Она, што Законот не можеше да го направи, бидејќи беше ослабен поради телото, го изврши Бог, испраќајќи Го Синот Свој во тело, слично на телото од гревот, и поради гревот Он го осуди гревот во телото,

⁴за да се оправда Законот во нас, кои живееме не по телото, туку по Духот.

⁵Оти оние, кои живеат по тело, мислат за телесното, а кои живеат по Дух — за духовното.

⁶Телесното мудрување е смрт, а духовното мудрување — живот и мир;

⁷бидејќи телесното мудрување е непријателство против Бога; на законот Божји тоа не му се покорува, ниту, пак, може.

⁸А оние, кои живеат по телото, не можат да Му угодат на Бога.

⁹Вие живеете не по тело, туку по дух, само тогаш ако Духот Божји живее во вас. Ако, пак, некој нема Дух Христов, тој не е Негов.

¹⁰Ако е, пак, Христос во вас, телото е мртво за грев, а духот живее поради правдата.

¹¹Но ако Духот на Оној, Кој Го воскресна од мртвите Исуса, живее во вас, тоа Оној, Кој Го воскресна Христа од мртвите, ќе ги оживотвори и вашите смртни тела преку Својот Дух, Кој живее во вас.

¹²И така, браќа, ние не сме му должни на телото, та да живееме по телото;

¹³бидејќи, ако живеете по телото, ќе умрете; но, ако преку Духот ги умртвувате работите на телото, ќе бидете живи.

¹⁴Сите оние, што се управуваат по Духот Божји, се синови Божји;

¹⁵оти вие не примивте дух на ропство, за да бидете во страв, туку Го примивте Духот на посинувањето, преку Кого велиме: Ава, Оче!

¹⁶Самиот Дух му сведочи на нашиот дух, дека ние сме чеда Божји.

¹⁷А ако сме, пак, чеда, ние сме и наследници Христови, но само ако со Него страдаме, та со Него и да се прославиме.

¹⁸Оти мислам дека страдањата на сегашното време не се ништо спрема славата, која ќе се јави во нас.

¹⁹А и тварите со нетрпение го очекуваат прославувањето на синовите Божји,

²⁰зашто и тие не ѝ се покорија на суетата доброволно, туку по волјата на Оној, Кој ги покори, а со надеж

²¹дека и тие сами ќе се ослободат од ропството на распаѓањето при славното ослободување на синовите Божји.

²²Оти знаеме дека сите созданија заедно со нас воздивнуваат и тажат досега.

²³И не само тие, туку и ние самите, кои го имаме начетокот на Духот, воздивнуваме во себеси, очекувајќи посинување и откупување на нашето тело,

²⁴бидејќи со надеж се спасивме. А надеж за она, што се гледа, не е надеж, оти, како ќе се надева некој на нешто, што го гледа?

²⁵Кога се надеваме, пак, на она, што не го гледаме, со трпение го очекуваме.

²⁶Исто така и Духот нѐ поткрепува во нашите немоќи; бидејќи не знаеме за што да се помолиме, како што треба, туку Духот Сам посредува за нас со неискажливо воздивнување.

²⁷А Оној, Кој ги испитува срцата, знае каква е мислата на Духот, бидејќи Он по волјата на Бога посредува за светиите.

²⁸Знаеме дека на оние што Го љубат Бога и се призвани по Негова волја, сѐ им врви добро;

²⁹оти оние, кои ги позна порано, нив и ги определи да бидат слични по образот на Неговиот Син, та Он да биде првороден меѓу многуте еднородни браќа.

³⁰А оние што ги предопредели, нив и ги повика; и кои ги повика, нив и ги оправда; кои ги оправда, нив и ги прослави.

³¹Што да речеме, пак, на ова? Ако е Бог со нас, кој ќе е против нас?

³²Оној, Кој не Го поштеди ни Својот сопствен Син, туку Го предаде за нас сите, како да не ни подари со Него сѐ?

³³Кој ќе ги обвини избраниците Божји? Бог е, Кој ги оправдува.

³⁴Кој е, што ќе суди? Христос ли Исус, Кој умре, но уште и воскресна, Кој е од десната страна на Бога, и Кој се застапува за нас?

³⁵Кој ќе нѐ одвои од љубовта Божја; тага ли, неволја ли, или гонење, глад ли, или голотија, опасност ли или меч?

³⁶Како што е напишано: »Заради Тебе секогаш нѐ убиваат; нѐ сметаат како овци за клање.«

³⁷Но во сето ова победуваме преку Оној, Кој нѐ возљуби.

³⁸Оти сигурно знам дека ни смртта, ни животот, ни ангелите, ни властите, ни силите, ни сегашнината, ни иднината,

³⁹ни височината, ни длабочината, ниту, пак, некоја друга твар ќе може да нѐ оддели од љубовта Божја во Христа Исуса, нашиот Господ.