Read Свето Писмо (Гаврилова) 1990 1. Коринтјаните 1 Bible Online

1. Коринтјаните 1 - Свето Писмо (Гаврилова) 1990 bible

1. Коринтјаните 1

¹Од Павла, повиканиот апостол на Исуса Христа по волјата Божја, и од братот Состен —

²до црквата Божја во Коринт, до осветените во Исуса Христа, до повиканите светии, заедно со сите оние, кои го призовуваат името на нашиот Господ Исус Христос на секое место, на нивно и на наше.

³Да имате благодат и мир од нашиот Бог Отец и од Господа Исуса Христа!

⁴Секогаш Му благодарам на Бога за вас поради даруваната ви во Христа Исуса Божја благодат,

⁵зашто преку Него се обогативте со сѐ, во секое слово и во секое знаење,

⁶откако се утврди во вас Христовото сведоштво,

⁷така што да не се лишавате од никаков дар, вие, што го очекувате откровението на нашиот Господ Исус Христос,

⁸Кој ќе ве утврди и до самиот крај, за да бидете беспрекорни во денот на нашиот Господ Исус Христос.

⁹Верен е Бог, преку Кого сте повикани за општење со Неговиот Син Исус Христос, нашиот Господ.

¹⁰Браќа, ве молам, во името на нашиот Господ Исус Христос, сите вие да зборувате едно и исто, и помеѓу вас да нема делење, туку да бидете соединети во еден дух и во една мисла.

¹¹Оти од домашните на Хлој чув за вас, браќа мои, дека помеѓу вас имало карање.

¹²А ова ви го велам, затоа што еден од вас вели: »Јас сум Павлов«, друг: »А јас сум Аполосов«, трет: »Јас сум на Кифа«, а друг: »Јас, пак, Христов«.

¹³Па зар Христос да се раздели? Дали Павле беше распнат за вас? Или пак во името Павлово се крстивте?

¹⁴Му благодарам на Бога, што од вас никого не сум крстил, освен Криспа и Гаја,

¹⁵та никој да не рече, дека сум крстил во свое име.

¹⁶Го крстив исто така и домот на Стефанин, а дали сум крстил и некој друг, не знам.

¹⁷Зашто Христос не ме прати да крштавам, туку да го проповедам Евангелието, и тоа не со премудри зборови, за да не ја изгуби силата крстот Христов.

¹⁸Бидејќи словото за крстот е безумство за оние, што гинат, а за нас, кои се спасуваме, сила Божја.

¹⁹Зашто е напишано: »Ќе ја погубам мудроста на мудрите и ќе го отфрлам разумот на разумните.«

²⁰Каде е мудрецот? Каде е книжникот? Каде е препирачот од овој век? Не ја обезуми ли Бог мудроста на овој свет?

²¹Зашто светот со својата мудрост не Го позна Бога во Неговата премудрост; Бог благоволи со безумството на проповедта да ги спаси оние што веруваат.

²²Оти и Јудејците сакаат знаци, а Елините бараат мудрост,

²³ние, пак, Го проповедаме Христа распнатиот, Кој е за Јудејците соблазан, а за Елините безумство;

²⁴за повиканите, пак, како Јудејците, така и Елините, Христа како Божја сила и Божја премудрост.

²⁵Зашто она, што е безумно за Бога, помудро е од луѓето, и она, што е за Бога немошно, посилно е од луѓето.

²⁶Гледате, браќа, какви сте вие, повиканите: не мнозина сте по тело мудри, не мнозина силни, не мнозина благородни;

²⁷но Бог го избра она, што е безумно во овој свет, за да ги посрами мудрите; Бог го избра она, што е слабо во овој свет, за да ги посрами силните;

²⁸Бог го избра она, што е од долно потекло и унизено во овој свет, и она, што не претставува ништо, за да го сосипе она, што е нешто,

²⁹та ниедно тело да не се пофали пред Бога.

³⁰Од Него сте и вие во Исуса Христа, Кој за нас стана премудрост од Бога, и правда, и осветување, и откуп,

³¹па да биде, како што е напишано: »Кој се фали, во Господа нека се фали«.