Read Свето Писмо (Гаврилова) 1990 1. Коринтјаните 11 Bible Online

1. Коринтјаните 11 - Свето Писмо (Гаврилова) 1990 bible

1. Коринтјаните 11

¹Угледајте се на мене, како што и јас на Христа!

²Ве пофалувам, браќа, дека сѐ мое помните и ги држите заповедите така, како што сум ви ги предал.

³Сакам уште да знаете дека глава на секој маж е Христос; а на жена глава е мажот; на Христа, пак, глава е Бог.

⁴Секој маж, кој се моли или пророкува со покриена глава, ја срамоти својата глава;

⁵и секоја жена, која се моли или пророкува гологлава, ја срамоти главата своја, зашто сеедно е — како да е истрижена.

⁶Ако жената не сака да се покрива, тогаш нека се стриже; ако, пак, е срамно жена да се стриже или бричи, тогаш нека се покрива.

⁷И така, мажот не треба да ја покрива главата своја, зашто е образ и слава Божја, а жената е слава на мажот.

⁸Оти не е мажот од жената, туку жената од мажот;

⁹и мажот не е создаден за жената, туку жената за мажот;

¹⁰Затоа жената треба да има на главата своја знак од власта на мажот над неа — поради ангелите.

¹¹Но сепак, ниту мажот без жената, ниту жената без мажот ги бива во Господа.

¹²Оти, како што е жената од мажот, така е и мажот преку жената; а сѐ е од Бога.

¹³Размислете сами во себе: прилично ли е жена да Му се моли на Бога гологлава?

¹⁴Нели и самата природа ве учи дека е срамно за мажот да има долга коса?

¹⁵Но, ако жената си ја остави косата, тоа е чест за неа, бидејќи косата ѝ е дадена место покривало.

¹⁶Но, ако некој сака да се препира, ние немаме таков обичај, ниту црквите Божји.

¹⁷А заповедајќи ви го ова, не ве фалам дека не за подобро, туку за полошо се собирате.

¹⁸Прво, пак, слушам дека, кога се собирате в црква, се појавуваат расцепи помеѓу вас, во што донекаде верувам.

¹⁹А потребно е меѓу вас да има и раздори, за да се истакнат подостојните меѓу вас.

²⁰Но, собирајќи се така заедно, не значи дека јадете вечера Господова;

²¹зашто секој брза да ја изеде својата вечера пред другите, така што еден останува гладен, а друг се опива.

²²Немате ли куќи за да јадете и пиете? Или ја презирате црквата Божја и ги срамотите оние, што не се имотни? Што да ви речам? Да ве пофалам ли за тоа? Не пофалувам!

²³А јас го примив од Господа она, што ви го предадов; а тоа е дека Господ Исус онаа ноќ, кога Го предадоа, зеде леб,

²⁴и, откако заблагодари, го прекрши и рече: »Земете, јадете, ова е телото Мое, кое се крши за вас; правете го ова за спомен Мој!«

²⁵По вечерата, исто така, зеде и чаша, па рече: »Оваа чаша е Новиот завет во Мојата крв; ова правете го, кога ќе пиете за Мој спомен!«

²⁶Оти, кога ќе го јадете овој леб и кога ќе ја пиете оваа чаша, вие ќе ја објавувате смртта на Господа, додека Он не дојде.

²⁷Затоа, оној што недостојно јаде од овој леб и пие од чашата Господова, виновен ќе биде спрема телото и крвта на Господа.

²⁸Но, човекот да се испита самиот себе и потоа да јаде од овој леб и да пие од оваа чаша.

²⁹Зашто, кој јаде и пие недостојно, тој го јаде и пие своето осудување, бидејќи не го разликува телото Господово.

³⁰Па затоа меѓу вас има многу немоќни и болни, а мнозина и умираат.

³¹Оти, ако бевме се испитувале сами себе, тогаш немаше да бидеме осудени.

³²Но судејќи нѐ, Господ нѐ накажа, за да не бидеме осудени заедно со светот.

³³Затоа, браќа мои, кога се собирате на јадење, чекајте се еден со друг.

³⁴Ако е, пак, некој гладен, нека јаде дома, за да не се собирате за осудување. А другото ќе го наредам, кога ќе дојдам.