Read Свето Писмо (Гаврилова) 1990 1. Коринтјаните 12 Bible Online

1. Коринтјаните 12 - Свето Писмо (Гаврилова) 1990 bible

1. Коринтјаните 12

¹А за духовните дарови, не сакам, браќа, да не знаете.

²Знаете дека, кога бевте незнабошци, се влечевте при немите идоли, како да ве водеа.

³Затоа ви кажувам дека никој, кој зборува преку Божјиот Дух, не фрла анатема на Исуса, и никој не може да Го нарече Исуса Господ, освен преку Светиот Дух.

⁴Постојат разни дарови, но Духот е еден и ист;

⁵има разни служби, но Господ е еден и ист;

⁶и разни сили постојат, но Бог е еден и ист, Кој врши сѐ во сѐ.

⁷А на секого му се дава во него да се пројави Духот за полза;

⁸оти, на еден му се дава преку Духот збор на мудрост, на друг — збор на знаење, преку истиот Дух;

⁹на еден — вера, преку истиот Дух; на друг — дар за лекување, преку истиот Дух;

¹⁰на еден — да чини чуда, на друг — да пророкува, на еден — да ги разликува духовите, на друг — разни јазици, на трет — да толкува јазици.

¹¹Сето ова го прави еден и ист Дух, распределувајќи секому поодделно, како што сака.

¹²И како што е телото едно, а има многу органи, и сите органи од тоа тело, па колку и да се тие, едно тело се, — така и Христос.

¹³Зашто преку еден Дух сме крстени сите во едно тело — било Јудејци или Елини, било робови или слободни; и сите сме со еден Дух напоени.

¹⁴Оти и телото не се состои од еден орган, туку од многу.

¹⁵Ако ногата рече: бидејќи не сум рака, не сум од телото, зар само заради тоа таа не е од телото?

¹⁶И ако увото рече: бидејќи не сум око, не сум од телото, зар поради тоа увото не е од телото?

¹⁷Ако целото тело би било око, тогаш каде ќе е слухот? Кога целото би било слух, тогаш каде е мирисањето?

¹⁸Но Бог ги наредил органите, секој од нив во телото така, како Му било угодно.

¹⁹Ако сите тие би биле само еден орган, тогаш каде е телото?

²⁰А сега се, пак, многу органи, но сепак едно тело.

²¹И не може окото да ѝ рече на раката: »Не си ми потребна«, ниту, пак, главата на нозете: »Не сте ми потребни«.

²²Напротив, оние органи од телото, кои ни изгледаат послаби, се многу попотребни;

²³и на оние членови на телото, за кои сметаме дека се понеугледни, им оддаваме повеќе чест;

²⁴и нашите понеугледни органи имаат поголема чест: угледните, пак, органи немаат потреба од чест. Но Бог го направи и телото така, што на најнезначајните органи им дал најголема чест,

²⁵за да нема расправии во телото, а органите подеднакво да се грижат едни за други.

²⁶А кога страда еден орган, тогаш страдаат сите органи; и кога се слави еден од органите, тогаш со него се радуваат сите органи.

²⁷Вие сте телото Христово, а поодделно — членови.

²⁸И едни од вас Бог постави во Црквата прво апостоли, второ пророци, трето учители; потоа даде дарби за чудеса и исцелување; па застапници, управници и луѓе што зборуваат на разни јазици.

²⁹Та сите ли се апостоли? Сите ли се пророци? Сите ли се учители? Сите ли се чудотворци?

³⁰Сите ли имаат дарби да лекуваат? Сите ли зборуваат на разни јазици? Сите ли се толкувачи?

³¹Покажувајте ревност за поголеми дарби; а јас ќе ви покажам уште подобар пат.