Read Свето Писмо (Гаврилова) 1990 1. Коринтјаните 4 Bible Online

1. Коринтјаните 4 - Свето Писмо (Гаврилова) 1990 bible

1. Коринтјаните 4

¹И така, секој човек нека нѐ смета нас за служители Христови и управници на тајните Божји,

²а од управниците понатаму се бара секој од нив да се покаже верен.

³За мене сосема малку значи што мислите вие за мене, или што мислат другите луѓе; јас и самиот не судам за себеси,

⁴зашто во ништо не се чувствувам виновен; но со тоа не се оправдувам: судија ми е Господ.

⁵Затоа, пак, не судете ништо пред време, додека не дојде Господ, Кој ќе ги изнесе на видело тајните на мракот и ќе ги објави намерите на срцата; и тогаш пофалбата на секого ќе му биде од Бога.

⁶Ова го направив, браќа, кон себеси и кон Аполос заради вас, за да се научите од нас да не мудрувате повеќе од она, што е напишано, и да не се гордеете еден пред друг поради некого.

⁷Оти, кој ти дава предимство? Што имаш, што не си добил? А штом си примил, зошто се фалиш, како да не си примил?

⁸Презаситени сте веќе, се збогативте веќе и се зацаривте без нас; камо да се бевте зацариле, та и ние да царуваме со вас!

⁹Мислам, дека нас апостолите, Бог нѐ постави најпоследни, како осудени на смрт; бидејќи станавме призор на светот — на ангелите и на луѓето.

¹⁰Ние сме безумни заради Христа, а вие сте мудри во Христа; ние сме немоќни, а вие сте силни; вие сте славни, а ние бесчесни.

¹¹До овој час ние и гладуваме, и жедуваме, и необлечени одиме, се мачиме и се потураме по светов,

¹²но се трудиме, работејќи со своите раце. Кога нѐ укоруваат, ние благословуваме, а кога нѐ гонат — трпиме;

¹³кога хулат на нас, ние се утешуваме. Станавме како сметиште на овој свет, како отпад на сите луѓе.

¹⁴Но ова ви го пишувам не за да ве посрамам, туку да ве поучам како мои омилени чеда.

¹⁵Зашто, ако имате и на десетина илјади наставници во Христа Исуса, многу татковци немате, бидејќи јас ве родив во Исуса Христа преку Евангелието.

¹⁶Затоа, ве молам, подражавајте ме мене, како што јас — Христа.

¹⁷Браќа, затоа го пратив при вас Тимотеј, кој ми е возљубено и верно чедо во Господа; тој ќе ви ги напомни патиштата мои во Христа, како што насекаде и во секоја црква учам.

¹⁸Некои се возгордееја, како да не ќе дојдам при вас;

¹⁹но наскоро ќе дојдам кај вас, ако сака Господ, и ќе ги познаам не зборовите, туку силата на оние, што се возгордеале,

²⁰зашто царството Божјо не е во зборови, туку во силата.

²¹Што сакате? Со стап ли да дојдам при вас, или со љубов и кроток дух?