Read Свето Писмо (Гаврилова) 1990 1. Коринтјаните 5 Bible Online

1. Коринтјаните 5 - Свето Писмо (Гаврилова) 1990 bible

1. Коринтјаните 5

¹Од секаде се слуша дека кај вас има блудство, и тоа какво блудство, за какво не се зборува дури ни при незнабошците, односно дека некој држи таткова жена.

²А вие уште се гордеете, место да плачете. Нека се исфрли од вашата средина оној, што го направил тоа дело.

³Јас, пак, иако со телото не сум при вас, а само со духот, веќе го осудив, како да сум меѓу вас, оној, што го направил тоа.

⁴Во името на нашиот Господ Исус Христос, кога ќе се соберете вие и мојот дух, со силата на нашиот Господ Исус Христос,

⁵да го предадете на сатаната, за мачење на неговото тело, та духот негов да биде спасен во денот на нашиот Господ Исус Христос.

⁶Фалбата ваша не е добра. Не знаете ли дека малку квас го потквасува целото тесто?

⁷Затоа, очистете го стариот квас, та да бидете ново тесто, како што сте бесквасни; оти Христос, Пасхата наша, се закла за нас.

⁸Па да празнуваме не со стар квас, ниту со квас од злоба и лукавство, туку со пресни лебови во чистота и вистина.

⁹Ви пишав во писмото свое — да не се мешате со луѓе што блудствуваат,

¹⁰но не и општо со блудници од овој свет, или со користољубци, или со грабачи, или со идолопоклоници, оти, инаку, би требало да излезете од овој свет.

¹¹Но сега ви пишувам да не се дружите со оној, кој наречувајќи се брат, си останува блудник, или користољубец, или идолопоклоник, или хулник, или пијаница, или грабач; со таков дури и да не јадете.

¹²Зашто, моја работа ли е да ги судам надворешните? Не ли ги судите вие внатрешните?

¹³Надворешните, пак, ќе ги суди Бог, а вие исфрлете го лошиот помеѓу вас.