Read Свето Писмо (Гаврилова) 1990 1. Коринтјаните 9 Bible Online

1. Коринтјаните 9 - Свето Писмо (Гаврилова) 1990 bible

1. Коринтјаните 9

¹Не сум ли јас апостол? Не сум ли слободен? Не Го видов ли Исуса Христа, нашиот Господ? Не сте ли вие мое дело во Господа?

²Ако на други не сум апостол, но на вас сум, бидејќи печатот на моето апостолство сте вие во Господа.

³Тоа е мојата заштита против оние што ме осудуваат.

⁴Зар немаме право да јадеме и да пиеме?

⁵Зар немаме право да водиме со себеси една жена сестра, како и другите апостоли и браќата Господови и Кифа?

⁶Или само јас и Варнава немаме право ова да го правиме?

⁷Кој војувал некогаш на своја сметка? Кој сади лозје, а не јаде од неговиот плод? Или кој пасе стадо, а не јаде од неговото млеко?

⁸Зар го зборувам ова само по човечки? Не го вели ли истото и Законот?

⁹Бидејќи во Мојсеевиот закон е напишано: »Не врзувај ја устата на вол, што врши«. Зар Бог се грижи за воловите?

¹⁰Или го вели тоа, главно, за нас? — Да, за нас е напишано тоа; зашто, оној што ора, треба да ора со надеж, и кој што врши, да врши со надеж, за да го добие она, што го очекува;

¹¹ако сме го посеале при вас духовното семе, многу ли е, ако го ожнееме кај вас телесното?

¹²Ако други имаат дел во она, со што располагате вие, тогаш колку повеќе ние? Но, ние не го користевме тоа право, туку сѐ трпиме, за да не направиме некаква пречка на Христовото Евангелие.

¹³Не знаете ли дека оние, што свештенодејствуваат, се хранат од светилиштето, и кои служат на жртвеникот, делат со жртвеникот?

¹⁴Така и Господ заповедал, проповедниците на Евангелието да живеат од Евангелието.

¹⁵Но јас не се ползував ни со едно од тие права; и не го пишав ова, за да се приложи сето тоа кон мене. Оти за мене е подобро да умрам, отколку некој пофалбата да ми ја одземе.

¹⁶Зашто, ако проповедам Евангелие, нема за што да се фалам: бидејќи тоа ми е должност, а тешко мене, ако не проповедам.

¹⁷Ако доброволно го вршам тоа, тогаш имам награда; а ако без своја волја — тогаш е тоа само извршување на поверена ми служба.

¹⁸А каква ми е наградата? Таа е дека проповедајќи го Евангелието, го проповедам за Христа дарум, не ползувајќи го своето право од благовествувањето.

¹⁹Зашто, иако слободен од сите, станав роб на сите, та повеќето од нив да ги придобијам:

²⁰на Јудејците им бев како Јудеец, за да ги придобијам Јудејците; за оние што се под Закон, станав како да сум под Закон, за да ги придобијам и нив;

²¹за оние што се без закон, станав како да сум без закон, иако пред Бога не сум без Закон, туку сум под Законот на Христа, за да ги придобијам и оние што се без закон.

²²За слабите станав како слаб, за да ги придобијам слабите. За сите станав сѐ, та по каков и да било начин да спасам некого.

²³А ова го правам поради Евангелието, за да бидам учесник во Него.

²⁴Не знаете ли, дека оние што се натпреваруваат на тркалиште, трчаат сите, но само еден добива награда? Па така трчајте и вие, за да добиете.

²⁵Секој што се бори, од сѐ се воздржува: оние — за да добијат распадлив венец, а ние — траен.

²⁶Јас, пак, сѐ така трчам, но не на несигурно; се борам не како оној што удира по ветар;

²⁷туку го истоштувам и го поробувам телото, да не би ненамерно, проповедајќи им на другите и сам да станам негоден.