Read Свето Писмо (Гаврилова) 1990 2. Коринтјаните 11 Bible Online

2. Коринтјаните 11 - Свето Писмо (Гаврилова) 1990 bible

2. Коринтјаните 11

¹Да го бевте истрпеле моето безумие! Но и истрпете ме!

²Оти за вас ревнувам со ревност Божја; зашто ве обручив за маж, за да ве претставам пред Христа како чиста девица.

³Но се плашам, да не би како што змијата со своето лукавство ја измами Ева, така и вашите мисли да се одвратат поради вашата простота во Христа;

⁴зашто, ако некој дојдеше да проповеда друг Исус, кого ние не сме го проповедале; или, ако добиевте друг дух, кого не сте го добиле, или друго благовестие, кое не сте го примиле, вие добро ќе го поднесевте.

⁵Но јас мислам дека во ништо не сум помал од врховните апостоли;

⁶иако сум прост во проповедта, во знаењето не сум. А насекаде и по сѐ сме ви добро познати.

⁷Погрешив ли што се понизував за да ве издигнам вас, бидејќи дарум ви Го проповедам Евангелието Божјо?

⁸Други цркви оштетив, добивајќи од нив издршка, та вам да ви служам, и додека бев при вас, иако бев во скудност, никому не дотегнав,

⁹оти немаштијата моја ја употполнија браќата, што дојдоа од Македонија. Па и во сѐ друго се пазев и ќе се пазам, да не ви бидам на товар.

¹⁰Како што е вистината Христова во мене, така и оваа пофалба нема да се одземе од мене во краиштата ахајски.

¹¹А зошто? Затоа ли што не ве сакам? Бог знае! Но, она што го правам, ќе го правам,

¹²за да не им дадам повод на оние, кои бараат причина, та во она, за кое се фалат, да се покажат како ние.

¹³Оти таквите се лажни апостоли, лукави работници, кои се преобразуваат во Христови апостоли.

¹⁴И не е за чудење: бидејќи самиот сатана се преобразува во ангел на светлината;

¹⁵та затоа не е голема работа, ако и слугите негови му се преобразуваат како слуги на правдата; но нивниот крај ќе им биде според делата нивни.

¹⁶Велам пак: никој да не ме смета за безумен; ако ли не, барем како безумен примете ме, та и јас да имам со што да се пофалам.

¹⁷А она, што го зборувам, не го зборувам по Господа, туку како безумен, во овој вид пофалба.

¹⁸Бидејќи мнозина се фалат по телото, ќе се пофалам и јас.

¹⁹Оти вие, како мудри луѓе, љубезно ги примате безумните;

²⁰вие ги поднесувате: ако некој ве натера да бидете слуги, ако некој ве јаде, ако некој од вас зема, ако некој се гордее, ако некој ве удира по образ.

²¹За срам зборувам: како да сме биле немоќни? Но ако некој се осмели, во безумство велам, ќе се осмелам и јас.

²²Евреи ли се? И јас сум. Израилец ли е? И јас. Семе Авраамово ли се? И јас.

²³Служители Христови ли се? Во безумство зборувам, јас сум повеќе. Повеќе се трудев, повеќе рани поднесов, повеќепати бев затворан во темница, и многупати на умирање.

²⁴Од Јудејците примив петпати по четириесет без еден удар;

²⁵трипати сум удиран со стапови, еднаш каменуван, трипати претрпев бродолом, и ноќ и ден поминав во длабочина;

²⁶многупати сум патувал, сум бил во опасност од реки, во опасност од сонародници, во опасност од разбојници, во опасност од друговерци, во опасност по градови, во опасност по пустини, во опасност по море, во опасност меѓу лажни браќа;

²⁷во труд и мака, во често неспиење, во глад и жед, во многу постење, на студ и голотија.

²⁸Освен надворешните непријатности, тука се уште и секојдневните напади против мене, како и грижата за сите цркви.

²⁹Кој ослаби, и јас да не ослабам? Кој се соблазни, и јас да не се распалам?

³⁰Ако треба да се фалам, со слабоста своја ќе се пофалам.

³¹Бог и Отецот на нашиот Господ Исус Христос, Кој е благословен во веки, знае, дека не лажам.

³²Во Дамаск управителот на цар Арета, друговерец, го пазеше градот Дамаск со стража, сакајќи да ме фати; и јас во кош бев спуштен и преку прозорец низ ѕид избегав од рацете негови.