Read Свето Писмо (Гаврилова) 1990 2. Коринтјаните 12 Bible Online

2. Коринтјаните 12 - Свето Писмо (Гаврилова) 1990 bible

2. Коринтјаните 12

¹Да се фалам, немам полза, но ќе минам кон виденија и откровенија Господови.

²Знам еден човек во Христа, кој пред четиринаесет години, со тело ли, не знам; без тело ли, не знам: Бог знае, беше грабнат и однесен до третото небо.

³И знам дека тој човек, со тело ли, или без тело — не знам: Бог знае,

⁴беше грабнат и однесен во рајот и дека чул неискажливи зборови, кои што човек не може да ги искаже.

⁵Со таков човек ќе се пофалам; но со себеси нема да се пофалам, освен со моите слабости.

⁶Ако, пак, посакам да се фалам, нема да бидам безумен, зашто ќе кажам вистина; но јас се воздржувам, да не би некој да помисли за мене повеќе, отколку што во мене гледа, или од мене слуша.

⁷И, за да не превознесувам со премногу откровенија, во телото ми се даде трн, ангел сатанин, да ме боцка по лицето, та да не се превознесувам.

⁸Затоа трипати Го молев Господа да го отстрани од мене.

⁹Но Он ми рече: »Доста ти е Мојата благодат, бидејќи Мојата сила наполно се покажува во слабоста«. Затоа со многу поголема радост ќе се фалам со своите немоќи, за да се весели во мене силата Христова.

¹⁰Затоа добро ми е во слабостите, во навредување, во маки, во прогонување, во тага за Христа, оти кога сум слаб, тогаш сум силен.

¹¹Станав безумен со фалбите свои: вие ме принудивте. Вие требаше да ме пофалите, зашто со ништо не сум подолен од врховните апостоли, иако сум ништо.

¹²Зашто белези апостолски се извршија меѓу вас во секое трпење, во знаци, чудеса и сили.

¹³Оти, по што станавте подолни од другите цркви, освен по она, што јас не ви дотегнав? Простете ми ја таа грешка!

¹⁴Еве, по третпат се готвам да дојдам при вас, и пак нема да паднам на ваш товар; оти јас не го барам вашето, туку вас: децата не се должни да собираат богатство за родителите, туку родителите за децата.

¹⁵А јас на драго срце сѐ ќе жртвувам и ќе се жртвувам себе за вашите души, иако, сакајќи ве премногу, вие многу помалку ме сакате.

¹⁶Но нека биде така! Јас не ви додевав; само бидејќи итар, ве добив на измама.

¹⁷Да не би да сум ве искористил преку оние, што ги испраќав при вас?

¹⁸Го замолив Тит, а со него го пратив и еден од браќата. Да не би Тит да ве исползувал во нешто? Не одевме ли со ист дух? Нели по истите стапки?

¹⁹Пак ли мислите дека пред вас се оправдуваме? Ние зборуваме пред Бога, во Христа, и сето тоа, возљубени, е за ваше издигање.

²⁰Бидејќи се плашам, да не би, кога ќе дојдам да ве најдам не такви, какви сакам; а и вие да ме најдете таков, каков што не сакате: да не би меѓу вас да има кавги, завист, гнев, гордост, раздор, клевети, охолост, бунење;

²¹да не би пак, кога ќе дојдам при вас, да ме унизи мојот Бог, и да плачам за мнозина, кои погрешиле порано и не се покајале за нечистотијата, блудството и срамотата, што ги направиле.