Read Свето Писмо (Гаврилова) 1990 Галатјаните 1 Bible Online

Галатјаните 1 - Свето Писмо (Гаврилова) 1990 bible

Галатјаните 1

¹Павле, апостолот, повикан ни од луѓе, ниту преку човек, туку преку Исуса Христа и Бога Отецот, Кој Го воскресна од мртвите,

²и сите браќа, што се со мене — до црквите во Галатија:

³благодат и мир на вас од Бога и Отецот и нашиот Господ Исус Христос,

⁴Кој се даде Себеси за нашите гревови, за да нѐ избави од сегашниот лукав век, по волјата на Бога и нашиот Отец,

⁵Кому нека е слава во веки веков. Амин!

⁶Се чудам дека така брзо се одвратувате од Оној, Кој ве повика преку благодатта Христова, и преминувате кон друго благовестие;

⁷не затоа што има друго евангелие, но има такви, што ве смутуваат и сакаат да го изопачат Благовестието Христово.

⁸Но дури и ние, или ангел од небото да ви благовестеше нешто друго од она, што ви благовестевме ние, нека биде анатема!

⁹Како што рековме порано, и сега пак велиме: оној што ви благовествува нешто поинаку од она што го примивте — нека биде анатема!

¹⁰Во луѓето ли сега барам благоволение, или во Бога? Или, пак, на луѓето ли сакам да им угодувам? Ако бев сакал да им угодувам на луѓето, немаше да бидам Христов слуга.

¹¹Браќа, ве известувам дека Евангелието, кое јас Го благовестив, не е човечко,

¹²зашто ни јас го примив, ниту го научив од човек, а преку откровението на Исуса Христа.

¹³А сте слушале и за моето некогашно поведение во јудејството, дека прекумерно ја гонев Божјата црква, и ја разорував;

¹⁴и дека во јудејството напредував многу повеќе од мнозина мои врсници, бидејќи бев голем ревнител за татковските преданија.

¹⁵А кога Бог, Кој ме избра од утробата на мојата мајка и ме призва преку Својата благодат, благоволи

¹⁶во мене да Го открие Својот Син, за да благовествувам за Него меѓу иноверците — веднаш не го прашав ни телото, ниту крвта,

¹⁷ниту, пак, отидов во Ерусалим при оние, што станаа апостоли пред мене, туку заминав за Арабија и пак се вратив во Дамаск.

¹⁸А на три години потоа отидов во Ерусалим за да се видам со Петра, и останав при него петнаесет дена.

¹⁹Други, пак, од апостолите не видов освен Јакова, братот Господов.

²⁰А за она што ви пишувам, еве, пред Бога велам дека не лажам.

²¹А потоа дојдов во земјите Сириски и Киликиски.

²²На Христовите цркви во Јудеја лично не им бев познат,

²³туку само беа слушале дека оној, кој некогаш нив ги гонел, сега ја проповеда верата, која што порано ја разорувал.

²⁴И Го прославува Бога за мене.