Read Свето Писмо (Гаврилова) 1990 Галатјаните 3 Bible Online

Галатјаните 3 - Свето Писмо (Гаврилова) 1990 bible

Галатјаните 3

¹О неразумни Галатјани! Кој ве замаја, та не се покорувате на вистината, вие, пред чии очи Исус Христос беше изобразен, а сега, еве, меѓу вас се распна?

²Само ова сакам да го узнаам од вас: преку делата по Законот ли го добивте Духот или преку послушноста во верата?

³Толку ли сте неразумни? Откако почнавте со Духот, со телото ли сега завршувате?

⁴Зарем залудо толку многу претрпевте? Да беше само залудо!

⁵Оној, пак, Кој ви Го дарува Духот и прави меѓу вас чудеса, преку делата на Законот ли го врши тоа, или преку послушноста во верата?

⁶Така, Авраам Му поверува на Бога, и тоа му се прими за оправдание.

⁷Знајте, пак, дека оние, што се потпираат на верата, се синови Авраамови.

⁸И Писмото, како што предвидуваше, оти Бог преку вера ги оправдува иноверците, однапред му благовести на Авраама: »Во тебе ќе бидат благословени сите народи.«

⁹И така, оние, што веруваат, се благословени заедно со верниот Авраам;

¹⁰а сите оние, што се од делата на Законот, под клетва се. Оти е напишано: »Проклет да е секој, кој не исполнува постојано сѐ што е напишано во книгата на Законот!«

¹¹А дека преку Законот никој не се оправдува пред Бога, се знае, оти »Праведниот ќе живее преку верата.«

¹²А Законот не е од верата, туку зборува: »Кој ќе ги исполни овие работи, тој ќе биде жив преку нив«.

¹³Христос нѐ искупи од клетвата на Законот, откако поради нас стана клетва, бидејќи е напишано: »Секој да е проклет што виси на дрво!«,

¹⁴та благословот на Авраама да се распространи над незнабошците, за да Го добиеме ветениот Дух преку верата.

¹⁵Браќа, зборувам на човечки начин: и утврдениот човечки завет никој веќе не го растури или дополни.

¹⁶Но ветувањата му беа дадени на Авраама и на семето негово. Не е речено: »и на семињата«, како за мнозина, а за еден: »и на семето твое«, кое е Христос.

¹⁷Јас, пак, велам дека Законот што се јави по четиристотини и триесет години, не го одменува порано утврдениот од Бога завет за Христа, та ветувањето да ја изгуби силата,

¹⁸оти, ако наследството е по Законот, тоа веќе не е според ветувањето; а на Авраама му го дарува по ветување.

¹⁹Зошто е, пак, даден Законот? Тој се додаде поради престапите, додека не дојде семето, на кое се однесува ветувањето, и е предаден преку ангели, преку рака на посредник.

²⁰Но посредникот не бива само посредник на еден, а Бог е еден.

²¹Па така, Законот противен ли е на Божјите ветувања? Никако! Оти, ако беше даден закон, што ќе можеше да животвори, тогаш навистина оправданието ќе излегуваше од Законот.

²²Но Писмото сите ги затвори под грев, та ветеното да им се даде на оние, кои веруваат во Исуса Христа.

²³Пред да дојде верата, ние бевме под стража на Законот, заклучени за верата, која имаше да се открие.

²⁴И така, Законот беше за нас воспитувач во Христа, за да се оправдаме преку верата;

²⁵а откако дојде верата, ние веќе не сме под раководство на воспитувач.

²⁶Оти сите сте синови Божји преку верата во Христа Исуса;

²⁷сите, што е крстивте во Христа, во Христа се облековте.

²⁸Нема веќе ни Јудејци, ни Елини, ни роб, ни слободен; нема машки пол, ни женски; зашто сите вие сте едно во Христа Исуса.

²⁹А, ако сте, пак, вие Христови, тогаш сте Авраамово семе, и по ветување наследници.