Read Свето Писмо (Гаврилова) 1990 Галатјаните 4 Bible Online

Галатјаните 4 - Свето Писмо (Гаврилова) 1990 bible

Галатјаните 4

¹Но ви велам: наследникот, додека е млад, со ништо не се разликува од робот, макар што е господар над сѐ;

²туку е под настојници и чувари до определениот рок од татка си.

³Па така и ние, додека бевме малолетни, бевме поробени од стихиите на светот;

⁴но, кога се исполни времето, Бог Го испрати Својот Син, Кој се роди од жена и се потчини на Законот,

⁵за да ги откупи оние, што се под Закон, та да примиме посиновение.

⁶А бидејќи вие сте синови, Бог Го испрати Духот на Својот Син во срцата ваши, Кој вика: Ава, Оче!

⁷Затоа не си веќе роб, туку син; ако си, пак, син, тогаш си и наследник Божји преку Исуса Христа.

⁸Но тогаш, бидејќи Бога не Го познававте, им служевте на богови, кои по својата природа не се богови;

⁹а сега, откако Го познавте Бога, или, подобро, откако Бог ве позна, како тоа пак да се враќате кон слабите и лоши стихии, на кои пак сакате одново да им служите?

¹⁰Гледате на деновите, месеците, времињата и годините.

¹¹Се плашам за вас, да не би случајно залудо да сум се трудел меѓу вас.

¹²Ве молам, браќа, бидете како што сум јас, затоа што и јас бев како вие. Вие со ништо не сте ме навредиле:

¹³знаете дека, кога ви проповедав, за првпат бев телесно немоќен,

¹⁴и при сето тоа, вие не го презревте искушението на моето тело, ниту се погнусивте од него, туку ме примивте како ангел Божји, како Исуса Христа.

¹⁵Каде ви е сега блаженството ваше? Сведочам за вас, дека кога би било можно, и очите свои би ги извадиле и би ми ги дале.

¹⁶И така, непријател ли ваш ви станав, кажувајќи ви ја вистината?

¹⁷Тие не ревнуваат за вас добро, туку сакаат да ве одвојат од мене, та вие за нив да ревнувате.

¹⁸Добро е секогаш да ревнувате во доброто, а не само кога сум меѓу вас.

¹⁹Чеда мои, кои пак со мака ве раѓам, додека не се изобрази во вас Исус Христос,

²⁰сега би сакал да бидам помеѓу вас и да го изменам гласот свој, бидејќи сум во недоумение за вас.

²¹Кажете ми, вие, што сакате да бидете под Законот: не го слушате ли Законот?

²²Зашто е напишано дека Авраам имаше двајца синови, еден од слугинката, а друг од слободната.

²³Но оној што беше од слугинката, се роди по плот; а оној што беше од слободната — по ветување.

²⁴А ова е речено сликовито и ги претставува двата завета: едниот од Синајската планина, која раѓа за ропство; а тој е Агара,

²⁵бидејќи Агара ја означува планината Синај во Арабија, а одговара на сегашниот Ерусалим и робува со децата свои;

²⁶а горниот Ерусалим е слободен: тој е мајка на сите нас.

²⁷Оти е напишано: »Развесели се неплодна, ти што не раѓаш; воскликни и извикај ти, што не си искусила породилни маки; бидејќи напуштената има многу повеќе деца од онаа, која има маж!«

²⁸Ние, пак, браќа, сме како Исак, чеда на ветувањето.

²⁹Но, како тогаш, оној што се роди по плот, го гонеше родениот по дух, така е и сега.

³⁰А што зборува Писмото? »Истерај ја робинката и синот нејзин, зашто синот на робинката нема да биде наследник заедно со синот на слободната!«

³¹И така, браќа, ние не сме деца на робинката, туку на слободната.