Read Свето Писмо (Гаврилова) 1990 Галатјаните 6 Bible Online

Галатјаните 6 - Свето Писмо (Гаврилова) 1990 bible

Галатјаните 6

¹Браќа, и да падне човек во некаков грев, вие духовните поправајте го таков со духот на кротоста, пазејќи се и вие да не бидете искушани.

²Поднесувајте ги тешкотиите еден на друг, и исполнувајте го така законот Христов.

³Зашто оној, кој што сам себе се смета за нешто, а е ништо, тој се мами самиот себе.

⁴Секој нека си ги испита делата свои, и тогаш ќе има пофалба само во себеси, а не пред друг,

⁵оти секој ќе го понесе своето бреме.

⁶А оној, што се учи на словото, нека му дава дел од секое добро на оној, кој што го учи.

⁷Не лажете се: Бог не позволува да биде поруган. Што ќе си посее човекот, тоа и ќе си жнее:

⁸кој сее во телото свое, од телото ќе пожнее погибел; а кој сее во духот, од духот ќе пожнее вечен живот.

⁹Кога правиме добро, тоа нека не ни биде здодевно, зашто во свое време ќе пожнееме, не заморувајќи се.

¹⁰И така, додека имаме време, да им правиме добро на сите, а најмногу на своите по вера.

¹¹Ете колку многу ви напишав со својата рака.

¹²Оние што сакаат да се фалат по тело, тие ве принудуваат да се обрезувате, само за да не бидат гонети поради крстот Христов.

¹³Оти, и оние, што се обрезуваат, сами не пазат на Законот, а сакаат вие да се обрезувате, за да се пофалат со вашето тело;

¹⁴а мене, да не ми даде Господ да се фалам со нешто друго, освен со крстот на нашиот Господ Исус Христос, преку Кого за мене светот е распнат, а и јас за светот.

¹⁵Зашто во Исуса Христа ниту обрезанието има некаква сила, ниту необрезанието, туку новата твар.

¹⁶На оние што постапуваат по тоа правило, нека биде мир и милост, ним и на Израилот Божји!

¹⁷И така, никој да не ми досадува веќе, зашто јас ги носам на своето тело раните на Господа Исуса.

¹⁸Благодатта на нашиот Господ, Исуса Христа нека биде со вашиот дух, браќа. Амин!