Read Свето Писмо (Гаврилова) 1990 Ефесјаните 4 Bible Online

Ефесјаните 4 - Свето Писмо (Гаврилова) 1990 bible

Ефесјаните 4

¹Браќа, јас, затвореник во Господа, ве молам да се однесувате достојно според звањето, за кое сте повикани,

²со секаква смиреност и кротост, со долготрпеливост, поднесувајќи се еден друг со љубов,

³трудејќи се да го запазите единството на Духот преку врските на мирот.

⁴Едно тело сте и еден Дух, како што сте и повикани кон една надеж на вашето звање.

⁵Еден е Господ, една е верата, едно е крштавањето,

⁶еден е Бог и Отец на сите, Кој е над сѐ, и преку сите, и во сите нас.

⁷А на секого од нас благодатта му е дадена според мерката на дарот Христов.

⁸Затоа е и речено: »Издигајќи се на височина, плени плен и им даде дарови на луѓето«.

⁹А што означува »издигајќи се«, ако не тоа дека Он слезе пред тоа во најдолните места на земјата.

¹⁰Слегнатиот е Истиот, Кој се издигна повисоко од сите небеса, за да исполни сѐ.

¹¹И Он постави едни за апостоли, други за пророци, трети за евангелисти, четврти за пастири и учители,

¹²за усовршување на светиите во делото на служењето, за изградување на Христовото тело,

¹³додека сите не стигнеме до единство во верата и познавање на Синот Божји, до состојба на совршен маж, до мера на полната возраст на Христовото совршенство,

¹⁴та да не бидеме веќе мали деца, што ги лула и занесува секој ветар на лажните учења, по лукавството на луѓето, по итрото искуство на измамата,

¹⁵туку со вистинска љубов во сѐ да растеме во Оној, Кој е глава, Христос,

¹⁶од Кого целото тело, составено и склопено и сврзано преку сите дарувани врски, при дејството на секој дел, поред силите негови, нараснува за да се изградува во љубов.

¹⁷Ова, пак, го зборувам и за сведок Го повикувам Господа: да не постапувате веќе, како што постапуваат и другите незнабошци, по суетата на својот ум;

¹⁸помрачени во разумот, отстранети се од Божјиот живот поради нивното незнаење и ожесточување на нивното срце;

¹⁹дојдени до бесчувство, тие се предадоа на бесрамност и ненаситно вршат секаква нечистота.

²⁰Но вие не Го познавате Христа така,

²¹кога навистина сте чуле за Него и во Него сте се научиле — дека вистината е во Исуса —

²²да го отфрлите од себе стариот човек според вашето поранешно живеење, кој се распаѓа во измамливите желби,

²³да се обновите со духот на својот ум

²⁴и да се облечете во новиот човек, создаден според Бога во правда и светост во вистината.

²⁵Поради тоа, откако ја отфрливте лагата, кажувајте си ја вистината секој на својот ближен, бидејќи сме членови еден на друг.

²⁶Гневете се, но не грешете: сонцето да не зајде во гневот ваш;

²⁷ниту, пак, да му давате место на ѓаволот.

²⁸Кој крадел, да не краде веќе; а подобро е да се труди, правејќи добро со рацете свои за да има што да му подаде на оној, кој што има потреба.

²⁹Никаков лош збор да не излегува од устата ваша, туку само добар, за издигање каде што треба, за да им принесе благодат на оние што слушаат.

³⁰И не Го оскрбувајте Светиот Дух Божји, со Кој сте запечатени за денот на избавувањето.

³¹Секое огорчение и јарост, гнев, викање и хулење нека бидат подалеку од вас заедно со секоја друга злоба;

³²а еден спрема друг бидете добри, сочувствителни, проштавајќи си еден на друг, како што и Бог ви прости во Христа.