Read Свето Писмо (Гаврилова) 1990 Филипјаните 4 Bible Online

Филипјаните 4 - Свето Писмо (Гаврилова) 1990 bible

Филипјаните 4

¹И така, браќа мои возљубени и многу пожелани, радост моја и венец, стојте тврдо во Господа, возљубени!

²Ја молам Еводија, ја молам и Синтихија да бидат едномислени во Господа;

³а те молам и тебе, искрени сотрудниче, помагај им ним, кои што се грижеа во Благовестието заедно со мене и со Климента и со другите мои сотрудници, чии имиња се во книгата на животот.

⁴Радувајте се секогаш во Господа, и пак ќе речам: радувајте се!

⁵Кротоста ваша нека им биде позната на сите луѓе! Господ е близу!

⁶За ништо не грижете се, туку во сѐ преку молитва и молба со благодарност изјавувајте ги пред Бога своите барања,

⁷и мирот Божји, што надвишува секој ум, ќе ги запази вашите срца и вашите мисли во Исуса Христа.

⁸А понатаму, браќа мои, на она што е вистинско, што е чесно, што е праведно, што е чисто, што е љубезно, што е достојно за слава, на она што е добродетел, што е за пофалба, само на тоа мислете!

⁹И она, што го научивте, примивте, чувте и видовте во мене, тоа вршете го — и Бог на мирот ќе биде со вас!

¹⁰Јас се зарадував необично многу во Господа, затоа што вие одново почнавте да се грижите за мене; вие и порано се грижевте за мене, но немавте згодно време.

¹¹Ова го велам не поради немање, бидејќи се научив да се задоволувам со она што го имам.

¹²Знам да живеам и во скудност, знам да живеам и во изобилство; научен сум на сѐ и секако, и сит да бидам, и глад да трпам, и во изобилие да сум, и во немање.

¹³Се можам преку Исуса Христа, Кој ме крепи.

¹⁴Покрај сето тоа, добро направивте што зедовте учество во мојата скрб.

¹⁵А знаете и вие, Филипјани, дека во почетокот на Благовестието, кога излегов од Македонија, немаше ниту една црква нешто да ми даде или нешто да примам освен од вас;

¹⁶зашто и во Солун, еднаш, и по вторпат, ми пративте нужни работи.

¹⁷Ова ви го велам не дека сакам да ми давате, туку го барам плодот, кој се умножува во ваша полза.

¹⁸Добив сѐ и имам во изобилие, се пренаполнив со блага, кога го примив од вас испратениот дар преку Епафродит, кој е мирис сладок, жртва пријатна, благоугодна на Бога.

¹⁹Мојот Бог, по Своето богатство, нека ја исполни секоја ваша потреба, за слава преку Христа Исуса.

²⁰А на Бога, нашиот Отец, слава во веки веков. Амин!

²¹Поздравете го секој светија во Христа Исуса! Ве поздравуваат браќата, што се со мене.

²²Ве поздравуваат сите светии, а особено оние што се од домот ќесарев.

²³Благодатта на нашиот Господ Исуса Христа нека биде со сите вас. Амин!