Read Свето Писмо (Гаврилова) 1990 Колосјаните 1 Bible Online

Колосјаните 1 - Свето Писмо (Гаврилова) 1990 bible

Колосјаните 1

¹Од Павла, по волјата Божја апостол на Исуса Христа, и братот Тимотеј,

²до светиите и верните браќа во Исуса Христа што се во Колоси: благодат на вас и мир од Бога нашиот Отец и Господа Христа!

³Му благодариме на Бога и Отецот на нашиот Господ Исус Христос, молејќи се секогаш за вас,

⁴бидејќи чувме за вашата вера во Христа Исуса и за љубовта ваша, која ја имате кон сите светии,

⁵поради надеж на она што ви е определено на небесата, за кое порано чувте од вистинското слово на Благовестието,

⁶кое што е во вас, како и во целиот свет, и принесува плод и расте, како и меѓу вас од оној ден, кога ја чувте и познавте вистински Божјата благодат.

⁷Како што и узнавте од Епафрас, нашиот возљубен сотрудник, кој е верен слуга Христов заради вас,

⁸и кој нѐ извести за вашата љубов во Духот.

⁹Затоа и ние од оној ден, кога го чувме тоа, не престануваме да се молиме и да сакаме да се исполните со познавање на Неговата волја во секоја мудрост и духовно разбирање,

¹⁰та да постапувате достојно за Бога, угодувајќи Му во сѐ, принесувајќи плод во секое добро дело и да растете во познавањето на Бога,

¹¹укрепувајќи се со секаква сила преку Неговата славна моќ за секаква трпеливост и големодушност со радост,

¹²благодарејќи Му на Бога и Отецот, Кој нѐ направи способни да учествуваме во наследството на светиите во светлината;

¹³нѐ избави од власта на темнината и нѐ доведе во царството на Својот возљубен Син,

¹⁴во Кого имаме откуп преку крвта Негова и опростување на гревовите,

¹⁵и Кој е образ на невидливиот Бог, првороден пред секоја твар;

¹⁶бидејќи преку Него е создадено сѐ што е на небесата и што е на земјата, видливо и невидливо; било престоли, било господства, било началства, било власти — сѐ е преку Него и за Него создадено.

¹⁷Он е пред сѐ, и сѐ преку Него се држи.

¹⁸И Он е глава на телото, односно на Црквата; Он е почеток, првороден меѓу мртвите, за да има првенство во сѐ.

¹⁹Бидејќи во Него благоволи Отецот да има секаква полнота,

²⁰и преку Него да измири сѐ со Себе, било земно, било небесно, творејќи мир со крвта на Неговиот крст.

²¹И вас, кои некогаш бевте отстранети од Бога, и Негови непријатели поради помислите кон лоши дела,

²²сега ве примири во телото на Неговата плот, преку Неговата смрт, за да ве претстави пред Себе свети, непорочни и без вина,

²³само ако останете во верата тврди и непоколебливи, и бидете неотклонливи во надежта на Евангелието, што го чувте, кое е проповедано на секое поднебесно создание, и Кому што јас, Павле, му станав слуга.

²⁴Сега се радувам во своите страдања за вас и го пополнувам недостигот од Христовите маки во мојата плот за телото Негово, кое е Црквата.

²⁵Нејзе ѝ станав служител по Божја наредба што ми е наложена мене за вас, за да го исполнам словото Божјо,

²⁶тајната, сокриена од векови и родови, а сега откриена на Неговите светии,

²⁷на кои Бог пожела да им покаже какво богатство на слава има во таа тајна за незнабошците, односно дека Христос, надежта на славата, е во нас,

²⁸Него ние Го проповедаме, вразумувајќи ги сите луѓе и учејќи ги на секоја мудрост, та сите нив да ги претставиме совршени во Христа Исуса;

²⁹затоа и се трудам и молам според Неговата сила, која моќно дејствува во мене.