Read Свето Писмо (Гаврилова) 1990 Колосјаните 3 Bible Online

Колосјаните 3 - Свето Писмо (Гаврилова) 1990 bible

Колосјаните 3

¹И така, ако сте воскреснале заедно со Христа, барајте го она што е горе, каде што Христос седи оддесно на Бога:

²мислете за небесното, а не за земното.

³Зашто вие умревте, и вашиот живот е сокриен со Христа во Бога.

⁴А кога ќе се јави Христос, вашиот живот, тогаш и вие ќе се јавите со Него во слава.

⁵Затоа умртвете ги своите земни членови, односно пороците: блудството, нечистотата, сласта, лошата желба, лакомството, кое е идолопоклонство!

⁶Поради тие пороци иде гневот Божји врз синовите на непослушноста,

⁷меѓу кои некогаш се движевте и вие, кога живеевте во тие пороци.

⁸А сега и вие отфрлете сѐ од себе: гневот, лутината, злобата, хулењето, срамните зборови од својата уста!

⁹Не лажете се еден со друг, откако веќе го соблековте стариот човек со неговите дела,

¹⁰и се облековте во новиот, кој се обновува во познанието, според образот на својот Создател,

¹¹каде што нема ни Елини, ни Јудејци, ни обрезание, ни необрезание, ни варварин, ни скит, ни роб, ни слободен, а сѐ и во сѐ е Христос.

¹²И така, како избраници Божји, свети и возљубени, облечете се во милосрдност, доброта, смиреност, кротост и долготрпеливост;

¹³трпете се еден со друг и проштавајте си. Ако некој има поплака на некого, како што Христос ви прости, така и вие направете!

¹⁴А над сето тоа облечете се во љубов, која е врска на совршенството,

¹⁵и мир Божји да владее во срцата ваши, за што сте повикани во едно тело, и бидете благодарни!

¹⁶Словото Христово изобилно нека се всели во вас; во секоја мудрост да се учите и да се советувате еден друг со псалми и химни, и со духовни песни, пеејќи Му на Господа со благодарност во срцата ваши!

¹⁷И сѐ што вршите со збор или со дело, вршете го во името на Господа Исуса Христа, благодарејќи Му преку Него на Бога и Отецот!

¹⁸Вие, жените, покорувајте им се на мажите свои, како што прилега во името на Господа!

¹⁹Вие, мажите, сакајте ги жените свои и не огорчувајте ги!

²⁰Деца, на родителите свои бидете им послушни во сѐ, зашто тоа Му е благоугодно на Господа!

²¹Татковци, не дразнете ја челадта своја, за да не паѓаат со духот!

²²Вие, робовите, во сѐ бидете им послушни на своите земни господари по тело, слугувајте им не само пред очи како да им угодувате на луѓе, туку во простотата на срцето, боејќи се од Бога!

²³И сѐ, што правите, правете го од душата, како за Господа, а не за луѓе,

²⁴знаејќи дека како награда ќе добиете од Господа наследство, бидејќи на Господа Христа Му служите.

²⁵А кој врши неправда, ќе добие според неправдата своја; и нема да се гледа кој е кој.