Read Свето Писмо (Гаврилова) 1990 1. Солунјаните 5 Bible Online

1. Солунјаните 5 - Свето Писмо (Гаврилова) 1990 bible

1. Солунјаните 5

¹А за времињата и годините, браќа, нема потреба да ви се пишува,

²бидејќи вие самите многу добро знаете дека денот Господов ќе дојде така, како крадец во ноќно време.

³Оти, кога ќе речат: »Мир и безопасност!«, тогаш ненадејно ќе ги стигне погибел, како што ја напаѓаат родилни маки секоја непразна жена, и нема да избегнат.

⁴Но вие, браќа, не сте во темнина, та денот да ве затече како крадец.

⁵Бидејќи сите вие сте синови на светлината и синови на денот: ние не сме синови на ноќта, ниту на темнината.

⁶И така, да не спиеме, како и другите, туку да бидеме будни и трезвени.

⁷Зашто оние, што спијат, ноќе спијат, и кои што се опиваат, ноќе се опиваат.

⁸Ние, пак, бидејќи синови на денот, да бидеме трезвени и »облечени во оклоп« на верата и љубовта и »шлем« на надежта за спасение,

⁹зашто Бог нѐ определи не за гнев, туку да добиеме спасение преку нашиот Господ Исус Христос,

¹⁰Кој умре за нас, та ние, будни ли сме, или спиеме, да живееме заедно со Него.

¹¹Поради тоа советувајте се помеѓу себе и поправајте го својот ближен, како што и правите!

¹²И ве молам, браќа, да ги уважувате оние, што се трудат меѓу вас, што се ваши претстојници во Господа, и оние кои ве учат.

¹³И кон нив да имате преголема љубов заради нивното дело. Живејте во мир помеѓу себе!

¹⁴Браќа, ве молам, поучувајте ги неуредните, утешувајте ги малодушните, поткрепувајте ги слабите и бидете долготрпеливи кон сите.

¹⁵Гледајте, никој никому да не враќа зло за зло; туку секогаш барајте добро еден на друг, и на сите!

¹⁶Радувајте се секогаш!

¹⁷Молете се постојано!

¹⁸Благодарете за сѐ, оти таква е волјата Божја во Христа Исуса спрема вас!

¹⁹Не гаснете го Духот! Пророштвата не ги унижувајте!

²⁰Сѐ испитувајте, за доброто држете се!

²¹Клонете се од секакво зло!

²²А Сам Бог на мирот да ве освети наполно во сѐ,

²³и целиот ваш дух и душата и телото да се запазат без порок при доаѓањето на нашиот Господ Исус Христос!

²⁴Верен е Оној, Кој ве повикува, Кој и ќе го направи тоа.

²⁵Браќа, молете се за нас!

²⁶Поздравете ги сите браќа со свет целив!

²⁷Ве заколнувам во Господа ова послание да го прочитате на сите свети браќа.

²⁸Благодатта на нашиот Господ Исус Христос нека биде со вас. Амин!