Read Свето Писмо (Гаврилова) 1990 Исус Навин 10 Bible Online

Исус Навин 10 - Свето Писмо (Гаврилова) 1990 bible

Исус Навин 10

¹Кога ерусалимскиот цар Адонивезек чу, дека Исус го презел Гај и го предал на клетва, и дека постапил со Гај и со царот негов така, како што постапил со Јерихон и царот негов, и дека Гаваонците склучиле мир со Исуса и со Израилот и со другите меѓу нив,

²тој многу се уплаши, бидејќи Гаваон беше голем град, како еден од царските градови, и поголем од Гај, и сите жители негови беа храбри луѓе.

³Поради тоа ерусалимскиот цар Адонивезек испрати пратеници кај хевронскиот цар Елам, и кај Феран, царот јеримутски, и кај Афи, царот лахиски, и кај Давир, царот одоламски, да им кажат:

⁴»Дојдете кај мене и помогнете ми да го сосипеме Гаваон, затоа што склучи мир со Исуса и синовите Израилеви.«

⁵Тие се собраа и отидоа петмина аморејски цареви: ерусалимскиот цар, хевронскиот цар, јеримутскиот цар, лахискиот цар, одоламскиот цар, тие и целиот нивни народ, и го опседнаа Гаваон и почнаа да војуваат против него.

⁶Гаваонците испратија до Исуса во логорот Израилев во Галгал, да кажат: »Не ја тргнувај раката од твоите робови; дојди поскоро кај нас, избави нѐ и помогни ни; зашто против нас се собрани сите аморејски цареви, што живеат во планините.«

⁷Исус тргна од Галгал, тој и со него сите способни за војна, и сите храбри мажи.

⁸Тогаш Господ му рече на Исуса: »Не се бој од нив, зашто Јас ги предадов во рацете твои: никој од нив нема да устои пред лицето твое.«

⁹И ги нападна нив Исус ненадејно, бидејќи целата ноќ беше одел од Галгал.

¹⁰Господ ги доведе во забуна од Израилците, и тие им нанесоа голем пораз во Гаваон, ги гонеа по патот кон Веторон и ги поразуваа дури до Азик и до Макид.

¹¹А кога бегаа од Израилците по падините на Веторонската планина, Господ фрлаше врз нив од небото големи камења до самиот град Азик, и тие умираа: умрените од камењата беа повеќе, отколку оние, што синовите Израилеви ги убија со меч во борбата.

¹²Тогаш Исус Му рече на Господа во оној ден, во кој Господ Бог го предаде Амореј во рацете на Израилот — откако ги порази во Гаваон, и тие беа избиени од синовите Израилеви, — и рече пред Израилците: »Запри се, сонце, над Гаваон, и ти, месечино, над долината Елон!«

¹³И сонцето застана, и месечината стоеше, додека Бог им се одмаздуваше на непријателите нивни. Нели е тоа запишано во книгите на Праведниот: »Сонцето застана на небото и не брзаше да зајде скоро цел ден?«

¹⁴Таков ден немало ни пред ни по оној, во кој Господ така да послушал човечки глас. Зашто Господ војуваше за Израилот.

¹⁵Потоа Исус и целиот Израил со него се вратија во логорот, во Галгал.

¹⁶А оние петмина цареви избегаа и се сокрија во пештерата во Макид.

¹⁷Кога му јавија на Исуса и му рекоа: »Ги најдовме петмината цареви, тие се кријат во пештерата во Макид«,

¹⁸Исус рече: »Навалете големи камења пред влезот на пештерата и поставете кај неа луѓе да ги пазат;

¹⁹а вие не се задржувајте тука, туку гонете ги непријателите ваши, истребувајте ги последните делови од војската нивна и не им дозволувајте да отидат по градовите нивни, бидејќи Господ, вашиот Бог, ги предаде во рацете ваши.«

²⁰Откако Исус и синовите Израилеви им нанесоа многу голем пораз, и другите од нив избегаа во утврдените градови,

²¹целиот народ се врати мирно во логорот кај Исуса во Макид, и никој не отвори уста против синовите Израилеви.

²²Тогаш Исус рече: »Отворете го влезот на пештерата и доведете ги кај мене од пештерата петмината цареви!«

²³Така и направија: ги доведоа кај него од пештерата петмината цареви: ерусалимскиот цар, хевронскиот цар, јермутскиот цар, лахискиот цар и одоламскиот цар.

²⁴Кога ги изведоа овие цареви пред Исуса, Исус ги повика сите Израилци и им кажа на воените началници, што беа оделе со него: »Приближете се, стапнете со нозете свои врз вратовите на тие цареви!«

²⁵Исус им рече: »Не плашете се и не се ужасувајте, бидете цврсти и храбри; зашто така ќе постапи Господ со сите ваши непријатели, со кои ќе војувате.«

²⁶Потоа Исус ги уби, и ги обеси на пет дрвја; и висеа на дрвјата до вечерта.

²⁷На зајдисонце Исус заповеда, и ги симнаа од дрвјата, ги фрлија во пештерата, во која се криеја, и на влезот на пештерата натрупаа големи камења, кои се и денес таму.

²⁸Во истиот ден го презедоа Макид и го поразија со меч него и царот негов, и сѐ живо, што се наоѓаше во него: не оставија никој, кој да не беше погоден или да избегал; и со макидскиотт цар постапија така, како што постапија со јерихонскиот цар.

²⁹Потоа тргна Исус и сите Израилци со него од Макид за Левна и војуваше против Левна

³⁰И ја предаде Господ и неа во рацете на Израилот и ја презедоа неа и царот нејзин, и истреби Исус со меч сѐ живо, што се наоѓаше во неа; не остави во неа никој, што не беше погоден или да избегал, а со царот постапи така, како што постапи со јерихонскиот цар.

³¹Од Левна тргна Исус и сите Израилци со него за Лахис, се улогори пред него и почна да војува против него;

³²и го предаде Господ Лахис во рацете на Израилот, и тој го презеде во вториот ден, и го порази со меч него и сѐ живо, што беше во него, и го истреби така, како што постапи со Левна.

³³Тогаш на помош на Лахис му дојде газерскиот цар Орам; но Исус го порази со меч и него и народот негов така, што не остави од народот никој што не беше погоден или да избегал.

³⁴И тргна Исус и сите Израилци со него од Лахис за Аглон, се улогори пред него и почна да војува против него;

³⁵го предаде Господ и него во рацете на Израилот и го презедоа во истиот ден и го поразија со меч, и со сѐ живо, што се наоѓаше во него во тој ден, постапи така, како што постапи со Лахис.

³⁶Потоа појде Исус и сите Израилци со него од Аглон за Хеврон, го опседнаа,

³⁷го презеде и го порази со меч него и царот негов, сите градови негови и сѐ живо, што се наоѓаше во него; не остави никој, што не беше убиен; како што постапи со Аглон, така го порази и него и сѐ живо, што се наоѓаше во него.

³⁸Потоа се обрна Исус и целиот Израил со него кон Давир и го опседна;

³⁹го презедоа него, царот негов и сите села негови, и го поразија со меч, и ги истребија нив и сѐ живо, што се наоѓаше во него: никого не остави жив; како што постапи со Хеврон и царот негов, со Левна и царот нејзин, така постапи и со Давир и царот негов.

⁴⁰И ја порази Исус целата планинска земја, и Нагев и рамницата и Асидот и сите цареви нивни; не остави никого да преживее, и сѐ живо погуби, како што беше заповедал Господ, Бог Изриалев.

⁴¹го порази Исус од Кадис — Варни дури до Газа и целата земја Госом дури до Гаваон;

⁴²и сите тие цареви и земјите нивни Исус ги презеде веднаш, бидејќи Господ, Бог Израилев, му помагаше на Израилот.

⁴³Потоа Исус и сите Израилци со него се вратија во логорот, во Галгал.