Read Свето Писмо (Гаврилова) 1990 Исус Навин 6 Bible Online

Исус Навин 6 - Свето Писмо (Гаврилова) 1990 bible

Исус Навин 6

¹Тогаш му рече Господ на Исуса: »Еве, Јас го предавам Јерихон во рацете твои и царот негов и силните луѓе во него;

²опколете го градот сите вие, способни за војна, и обиколувајте го градот по еднаш секој ден, така правете шест дена;

³и седум свештеници нека носат пред ковчегот седум труби од рогови; а седмиот ден обиколете го градот седумпати и свештениците нека трубат со трубите од рогови.

⁴И штом ќе затрубат со трубниот рог, па го чуете гласот трубен, целиот народ нека воскликне, и градските ѕидишта ќе паднат сами до основата своја пред оние што викаат; и тогаш целиот народ да навлезе во градот, тргнувајќи секој од своето место.«

⁵Тогаш дојде Исус, синот Навинов, кај свештениците Израилеви и им рече: »Земете го ковчегот на заветот Господов и седум свештеници нека носат седум рожени труби пред ковчегот Господов!«

⁶И им рече, велејќи: »Заповедајте му на народот да го обиколат и да го опкружат градот; а вооружените нека одат пред ковчегот Господов.«

⁷Штом Исус му го кажа тоа на народот, рече и седумте свештеници, што ги имаа седумте свештени труби, да појдат и да затрубат громогласно со трубите, и ковчегот на заветот Господов да оди по нив.

⁸Вооружените, пак, одеа пред свештениците, кои трубеа со трубите; и оние што одеа по нив, по ковчегот на заветот Господов, трубеа со трубите.

⁹На народот, пак, Исус му заповеда и рече: »Не викајте и да не се чуе глас од вас, и да не излегува збор од устата ваша до оној ден, додека не ви заповедам: викајте! — и тогаш ќе викнете.«

¹⁰Така ковчегот на заветот Господов тргна околу градот и еднаш го обиколи; и дојдоа во логорот и ноќеваа во него.

¹¹На вториот ден Исус стана утрината рано, и свештениците го понесоа ковчегот на заветот Господов;

¹²и седумте свештеници, што ги носеа седумте труби пред ковчегот Господов, одеа и трубеа со трубите; вооружените, пак, одеа пред нив, а другите одеа по ковчегот на заветот Господов и свештениците затрубија со рожените труби.

¹³И вториот дена го обиколија градот еднаш и се вратија во логорот. Така правеа шест дена.

¹⁴На седмиот ден станаа рано и го обиколија градот седумпати; само тој ден го обиколија градот седумпати.

¹⁵И при седмото заобиколување свештениците затрубија во трубите. Тогаш Исус му рече на народот: »Викајте, бидејќи Господ ви го предаде градот!

¹⁶И градот нека биде проколнат, и сѐ што е во него, од силата Господова; само блудницата Раав запазете ја, неа и секој што е во домот нејзин; зашто таа ги сокри извидниците што ги пративме.

¹⁷Но вие пазете се од клетвата, за да не паднете и самите по клетва, ако земете нешто од заколнатото, и со тоа на логорот и на синовте Израилеви да им нанесете клетва, и нас да нѐ истребите.

¹⁸Златото, пак, среброто и бакарот и железото се за Господа и да се внесат во сокровиштето Господово!«

¹⁹И затрубија свештениците со трубите. Штом го чу народот гласот на трубите, сите заедно извикаа со висок и силен глас, и сите градски ѕидишта паднаа, и целиот народ влезе во градот, секој од своето место, и го презедоа градот.

²⁰И проколна Исус сѐ што беше во градот, — мажите и жените, младите и старите, овците и ослите; сѐ се истреби со меч.

²¹А на двајцата младичи што ја беа разгледале земјата, Исус им рече: »Влезете во домот на жената блудница и изведете ја оттаму неа и сите што се кај неа, бидејќи вие ѝ се заколнавте.«

²²Тогаш влегоа младичите, што го разгледуваа градот, во домот на жената и ја изведоа блудницата Раав и таткото нејзин, мајката нејзина, браќата нејзини и сите нејзини роднини и сите, што беа кај неа, ги изведоа и ги ставија надвор од логорот на Израилот.

²³А градот и сѐ што беше во него, го изгореа со оган; само среброто и златото, бакарот и железото ги предадоа, за да се внесат во сокровишницата Господова.

²⁴Блудницата, пак, Раав и целиот нејзин татков дом, Исус ги остави живи, и таа живее меѓу Израилот до денес, зашто ги сокри извидниците, што ги испрати Исус за да го разгледаат Јерихон.

²⁵Во тој ден Исус проколна и рече: »Проклет да биде пред Господа оној, што ќе го издигне и изгради овој град Јерихон; врз првородениот син свој тој ќе ги положи основите негови и врз најмалиот син свој ќе ги постави портите негови!« А тоа го направи Азан, родум од Ветил; тој го основа врз првородениот син свој Авирон и врз најмалиот, Спасен, ги постави портите негови.

²⁶И Господ беше со Исус, и славата Негова се разнесуваше по целата земја.