Read Свето Писмо (Гаврилова) 1990 2. Солунјаните 3 Bible Online

2. Солунјаните 3 - Свето Писмо (Гаврилова) 1990 bible

2. Солунјаните 3

¹Потоа, браќа, молете Му се на Бога, за нас, та словото Господово да се распространува и да се слави на секое место, како и меѓу вас,

²и да се избавиме од жестоки и злобни луѓе, бидејќи не сите имаат вера.

³Но верен е Господ, Кој ќе ве утврди и запази од лукавиот.

⁴Ние сме уверени за вас во Господа дека го вршите и дека ќе го вршите она што ви го заповедаме.

⁵А Господ нека ги управи срцата ваши кон љубовта Божја и трпението Христово!

⁶Ви заповедам, браќа, исто така во името на нашиот Господ Исус Христос, да се двоите од секој брат, кој живее неуредно, а не според преданието, што го добија од нас!

⁷Сами знаете како треба да се угледате на нас, бидејќи ние не живеевме неуредно при вас,

⁸ниту, пак, при некого јадевме леб дарум, туку работевме со труд и мака дење и ноќе, за да не му додеваме на никого од вас.

⁹И не поради тоа што немавме власт, туку за да бидеме пример, та да се угледате на нас.

¹⁰Зашто, кога бевме меѓу вас, ви го заповедавме ова — дека кој не сака да работи, нека и не јаде.

¹¹Но слушаме оти некои од вас живеат неуредно, ништо не работат, туку се занимаваат со празни работи;

¹²на таквите им заповедаме и ги молиме во нашиот Господ Исус Христос да работат мирно и да го јадат својот леб.

¹³А вие, браќа, не паѓајте со духот, кога вршите добро.

¹⁴Ако некој не ги послуша нашите зборови од ова послание, означете го и не дружете се со него, за да се посрами;

¹⁵но не сметајте го за непријател, туку поучувајте го како брат.

¹⁶А Сам Господ на мирот нека ви даде мир секогаш и во секое дело! Господ нека е со сите вас!

¹⁷Своерачен поздрав од мене, Павла; тоа е белег во секое послание; јас пишувам така:

¹⁸благодатта на нашиот Господ Исус Христос нека биде со сите вас. Амин!