Read Свето Писмо (Гаврилова) 1990 1. Тимотеја 2 Bible Online

1. Тимотеја 2 - Свето Писмо (Гаврилова) 1990 bible

1. Тимотеја 2

¹Молам, пред сѐ, да се прават просби, молитви, молби и благодаренија за сите луѓе:

²за царевите и за сите што се на власт, та да поживееме тих и мирен живот во потполна побожност и чистота;

³оти тоа е добро и угодно пред нашиот Спасител Бога,

⁴Кој сака сите луѓе да се спасат и да ја познаат вистината.

⁵Зашто еден е Бог, и еден е Посредникот помеѓу Бога и луѓето — Човекот Христос Исус,

⁶Кој се даде Себеси како откуп за сите — а тоа се посведочи во свое време;

⁷па затоа сум поставен како проповедник и апостол — зборувам вистина во Христа, не лажам — како учител на иноверците во верата и вистината.

⁸И така, мажите сакам да се молат на секое место, кревајќи ги чистите раце без гнев и сомневање.

⁹Исто така и жените, облечени пристојно, со срамежливост и чесност да се украсуваат, не со плетенки, ни со злато, или со бисери, или со скапоцени облеки,

¹⁰туку со добри дела, како што им прилега на жени, што ѝ се посветуваат на побожноста.

¹¹Жената да се учи во мир и потполно покорство.

¹²На жена не ѝ позволувам да поучува, ниту да господари над мажот, туку да биде мирна.

¹³Бидејќи порано беше создаден Адам, а потоа Ева;

¹⁴и Адам не беше измамен, туку жената беше измамена и направи престап:

¹⁵но ќе се спаси преку раѓање деца, ако остане во верата, љубовта и во светоста со чесност.