Read Свето Писмо (Гаврилова) 1990 1. Тимотеја 6 Bible Online

1. Тимотеја 6 - Свето Писмо (Гаврилова) 1990 bible

1. Тимотеја 6

¹Оние, кои се наоѓаат под ропско иго, господарите свои нека ги сметаат како достојни за секаква почест, за да не се хули името Божјо и учењето.

²Оние, пак, кои имаат господари што поверувале, нека не се однесуваат кон нив незаинтересирано, затоа што се браќа; туку со поголема усрдност да служат, бидејќи тие, што ги добиваат нивните услуги, се верни и возљубени. Така поучувај и советувај!

³Кој поучува инаку и не врви по здравите зборови на нашиот Господ Исус Христос и според учењето за благочесноста,

⁴тој е помрачен од гордоста, не знае ништо и е болен од празни препирки и запрашувања, од кои произлегуваат зависта, карањето, хулењето, лошите мисли;

⁵залудните препирки меѓу луѓето, што имаат изопачен ум, лишени се од вистината; тие мислат дека побожноста служи за трговија. Бегај од такви!

⁶А голема печалба е, навистина, да биде човек благочестив и задоволен со себеси.

⁷Бидејќи ништо не сме донеле на светов, јасно е дека не можеме и ништо да однесеме.

⁸Но кога имаме храна и облекло, со тоа да бидеме задоволни.

⁹А оние, што сакаат да се збогатуваат, паѓаат во искушение, во примки и во многу неразумни и штетни желби, што го потопуваат човекот во пропаст и погибел.

¹⁰Зашто коренот на сите зла е среброљубието, на кое што некои, откако му се предадоа, се отклонија од верата и си навлекоа многу маки.

¹¹Но ти, човеку Божји, бегај од ова и стреми се кон праведност, побожност, вера, љубов, трпеливост и кротост!

¹²Бори се во добриот подвиг на верата; држи се за вечниот живот, за кој си и повикан и си дал добра исповед пред многу сведоци.

¹³Ти заповедам пред Бога, Кој сѐ оживотворува, и пред Исуса Христа, Кој ја посведочи добрата исповед пред Понтиј Пилат,

¹⁴да ја запазиш заповедта чиста и беспрекорна дури до доаѓањето на нашиот Господ Исус Христос,

¹⁵кое што, кога ќе му дојде времето, ќе Го открие Блажениот и единствен владетел, Цар над царевите и Господар над господарите,

¹⁶Кој е единствен бесмртен и живее во непристапна светлина, Кого никој од луѓето не Го видел, ниту може да Го види. Нему нека Му е чест и сила во сите векови. Амин!

¹⁷Заповедај им на богатите од овој свет да не се гордеат, ниту да се надеваат на непостојаното богатство, туку на живиот Бог, Кој ни дава за наслада сѐ во изобилие;

¹⁸нека прават добро, нека богатеат со добри дела, да бидат штедри и пристапливи,

¹⁹и по таков начин да си собираат сокровиште — добра основа за иднината, за да постигнат живот вечен.

²⁰О Тимотеје, пази го она што ти е предадено, и клони се од нечисти и празни разговори и од расправии на лажната наука,

²¹со која, откако некои се занимаваа, се отклонија од верата. Благодатта нека биде со тебе. Амин!