Read Свето Писмо (Гаврилова) 1990 2. Тимотеја 2 Bible Online

2. Тимотеја 2 - Свето Писмо (Гаврилова) 1990 bible

2. Тимотеја 2

¹Чедо мое, потсилувај се во благодатта, што ти е дадена од Христа Исуса,

²и сѐ, што си чул од мене пред многу сведоци, предај го на верни луѓе, кои се способни и други да научат.

³Па така, поднесувај страдања како добар војник на Исуса Христа.

⁴Оти ниеден војник не се вплетува во светски работи, за да му угоди на својот началник.

⁵А ако, пак, некој војува, сепак венец не добива, бидејќи не се борел според правилата.

⁶Земјоделецот што се труди, прв треба да вкуси од плодот.

⁷Разбери што ти зборувам; а Господ нека ти даде разум во сѐ!

⁸Помни Го Господа Исуса Христа од родот Давидов, Кој воскресна од мртвите, онака како што ви проповедав,

⁹поради кое страдам, дури до окови, како злочинец. Но словото Божјо не се врзува.

¹⁰Затоа сѐ трпам заради избраните, та и тие да добијат спасение во Христа Исуса со вечна слава.

¹¹Верни се зборовите: »Ако со Него сме умреле, со Него и ќе оживееме.

¹²Ако трпиме, со Него и ќе царуваме; ако се одречеме, и Он ќе се одрече од нас.

¹³Ако не веруваме, Он останува верен, бидејќи Сам Себеси не може да се одрече.«

¹⁴Ова напомнувај го и сведочи пред Господа за да не се препираат, оти препирките ништо не помагаат, а дури им штетат на оние, што слушаат.

¹⁵Погрижи се пред Бога да се покажеш како достоен и беспрекорно работлив, кој верно го проповеда словото на вистината.

¹⁶А од непристојни и празни зборови клони се, зашто тие ги водат луѓето секогаш кон безбожност.

¹⁷И словото нивно ќе се пренесува како жива рана. Такви се Именеј и Филит,

¹⁸кои отстапија од вистината, говорејќи дека воскресението веќе станало, и со тоа им попречуваат во верата на некои.

¹⁹Но Божјата цврста основа стои непоколебливо, имајќи го овој печат: »Ги позна Господ Своите« и »Да отстапи од неправдата секој, што го произнесува името Господово!«

²⁰Во голем дом има не само златни и сребрени садови, туку и дрвени, и земјани; и едните се за почесна употреба, а другите за нечиста.

²¹И така, ако некој се очисти од тоа, тој ќе биде сад за почест, осветен, приспособен за употреба на господарот и приготвен за секое добро дело.

²²Избегнувај ги, исто така, и желбите на младоста, туку стреми се кон правда, вера, љубов и мир со оние, што Го призовуваат Господа од чисто срце!

²³Глупави и празни расправии избегнувај, знаејќи дека тие породуваат кавги!

²⁴А слугата Господов не треба да влегува во расправии; туку да биде кроток кон сите, поучлив и незлобив.

²⁵И со кротост поучувај ги оние што се противат, та не би ли им дал Бог покајание, за да ја познаат вистината,

²⁶и да се ослободат од мрежата на ѓаволот, кој ги уловил живи, за да ја исполнуваат неговата волја.