Read Свето Писмо (Гаврилова) 1990 2. Тимотеја 3 Bible Online

2. Тимотеја 3 - Свето Писмо (Гаврилова) 1990 bible

2. Тимотеја 3

¹Но ова знај го: во последните денови ќе настанат времиња тешки.

²Зашто луѓето ќе станат саможиви, среброљупци, самофалци, горди, хулители, непокорни спрема родителите, неблагодарни, неправедни, недружељубиви,

³непомирливи, клеветници, невоздржливи, нескротливи, недоброљупци,

⁴предавници, пребрзи, надуени, повеќе сластољупци отколку богољупци,

⁵на изглед побожни, а од силата на Бога се одрекле. И од нив одвратувај се!

⁶Кон нив припаѓаат и оние што се завлекуваат по куќите и измамуваат жени, што се претоварени со гревови и обземени од разни похоти,

⁷жени, кои секогаш се учат и никогаш не можат да дојдат до познавањето на вистината.

⁸Па, како што му се противеа на Мојсеја Јаниј и Јамвриј, така и тие ѝ се противат на вистината, бидејќи се луѓе со изопачен ум, неискусни во верата.

⁹Но нема да успеат повеќе, зашто безумието нивно ќе се открие пред сите, како и на оние двајца.

¹⁰Ти се угледа на моето учење, животот, целта, верата на мојата големодушност, љубовта, трпеливоста,

¹¹на моите гонења и страдања, што ми се случија во Антиохија, и во Иконија, и во Листра, какви прогони претрпев; и од сѐ Господ ме избави.

¹²Па и сите, што сакаат да живеат побожно во Христа Исуса, ќе бидат гонети.

¹³А лошите луѓе и лажливците ќе напредуваат во злото, заблудувајќи други како и себеси.

¹⁴Но ти остани во тоа, што си го научил, и што ти е поверено, знаејќи од кого си го научил,

¹⁵бидејќи уште како мал ги знаеш Светите Писанија, што можат да те направат мудар за спасение преку верата во Христа Исуса.

¹⁶Целото Писмо е од Бога вдахновено и полезно за поука, за изобличување, поправање и поучување во правдата,

¹⁷за да биде Божјиот човек совршен и годен за секое добро дело.