Read Свето Писмо (Гаврилова) 1990 2. Тимотеја 4 Bible Online

2. Тимотеја 4 - Свето Писмо (Гаврилова) 1990 bible

2. Тимотеја 4

¹И така, те заколнувам пред Бога и нашиот Господ Исус Христос, Кој ќе им суди на живите и мртвите, кога ќе дојде Он и Неговото царство:

²проповедај го словото, настојувај во погодно време и во невреме, изобличувај, забранувај, советувај со голема долготрпеливост и поука.

³Оти ќе дојде време, кога луѓето нема да го слушаат здравото учење, но водени по своите похоти, ќе си изберат учители да им го залажат слухот;

⁴тие ќе го одвратат слухот свој од вистината и ќе се обрнат кон бајки.

⁵Но ти во сѐ биди трезвен, претрпи зло, направи дело достојно на евангелист, службата своја исполнувај ја добро!

⁶Зашто јас веќе станувам жртва, а времето на моето одење настапи.

⁷Добро се борев, патот го завршив, верата ја запазив;

⁸понатаму ме очекува венецот на правдата, што ќе ми го даде во оној ден Господ, праведниот Судија; но не само мене, туку и на сите кои се радуваат на Неговото доаѓање.

⁹Погрижи се да дојдеш при мене скоро!

¹⁰Оти Димас ме остави, бидејќи го засака сегашниов свет, и отиде во Солун; Крискент — во Галатија, Тит — во Далмација. Само Лука е со мене.

¹¹Земи го Марка и доведи го со себеси, оти ми е нужен во службата!

¹²А Тихика го пратив во Ефес.

¹³Кога ќе дојдеш, донеси ја наметката, што ја оставив во Троада, кај Карп и книгите, а особено пергаментите.

¹⁴Ковачот Александар ми направи големо зло. Нека му врати Господ според делата негови!

¹⁵Од него пази се и ти, бидејќи тој необично многу се воспротиви на нашите зборови!

¹⁶При мојата прва одбрана никого немаше при мене: сите ме оставија. Нека не им се прими за грев!

¹⁷Но Господ беше со мене и ме укрепи, та преку мене да се утврди Благовестието и да чујат сите незнабошци; и јас се избавив од устата на лавот.

¹⁸Господ ќе ме избави од секакво лошо дело и ќе ме запази за Своето небесно царство. Нему слава во веки веков. Амин!

¹⁹Поздрави ги Прискила и Акила, и Онисифоровиот дом.

²⁰Ераст остана во Коринт. А Трофим го оставив болен во Милет.

²¹Побрзај да дојдеш пред зимата! Те поздравуваат Евул, Пуд, Лин, Клаудија и сите браќа.

²²Господ Исус Христос нека е со твојот дух! Благодат на сите вас. Амин!