Read Свето Писмо (Гаврилова) 1990 Евреите 1 Bible Online

Евреите 1 - Свето Писмо (Гаврилова) 1990 bible

Евреите 1

¹Бог, Кој во старо време, откако многупати и на многу начини им зборуваше на оците наши преку пророците,

²во последниве дни ни зборува преку Синот, Кого Го постави за наследник над сѐ, преку Кого ги создаде и вековите

³и Кој, бидејќи светлост на славата и обличје на Неговото суштество, и држејќи сѐ со Своето моќно слово, откако преку Себе ги очисти нашите гревови, седна од десната страна на престолот на величието во висините

⁴и стана толку погорен од ангелите, во колку пославно име од нив наследи.

⁵Зашто кому од ангелите му рекол некогаш: »Ти си Син Мој, Јас Те родив денес«, и пак: »Јас ќе Му бидам Татко, а Он ќе ми биде Син?«

⁶Исто така, кога Го воведе Првородниот во вселената, рече: »Да Му се поклонат сите ангели Божји!«

⁷За ангелите, пак, е речено: »Ти ги правиш ангелите Свои духови, и служителите Свои оган пламенен«,

⁸а за Синот: »Твојот престол, Боже, е вечен« и »Жезалот на правдата е жезал на царството Твое.

⁹Тебе Ти омиле правдата, а омрзна беззаконието; затоа, Боже, Твојот Бог Те помаза со елеј на радоста повеќе од Твоите соучесници«.

¹⁰И пак: »Во почетокот Ти, Господи, си ја основал земјата, а и небесата се дело на Твоите раце;

¹¹тие ќе загинат, Ти остануваш; сите ќе изветвеат како облека;

¹²ќе ги свиткаш како наметало, и тие ќе се изменат: но Ти си секогаш Ист, и Твоите години нема да се свршат«.

¹³А на кого од ангелите Бог некогаш му рекол: »Седи од Мојата десна страна, дури непријателите Твои не ги ставам во подножјето на нозете Твои?«

¹⁴Нели се тие сите службени духови, определени да им служат на оние, што ќе го наследат спасението?