Read Свето Писмо (Гаврилова) 1990 Евреите 10 Bible Online

Евреите 10 - Свето Писмо (Гаврилова) 1990 bible

Евреите 10

¹Законот, имајќи ја сенката на идните добра, а не самиот образ на работите, никогаш не може со оние исти жртви, што се принесуваат секоја година, да ги усоврши оние, кои пристапуваат.

²Инаку, би престанале да се принесуваат, бидејќи оние, што служат, веднаш очистени, не ќе имаат веќе никакво сознавање за гревови.

³Но со жртвите секоја година се напомнува за гревовите,

⁴бидејќи не е можно телешката и јарешката крв да ги премавне гревовите.

⁵Поради тоа, влегувајќи во светот, вели: »Жртви и дарови Ти не посака, а телото Ми го приготви.

⁶Сепаленици за гревот не Ти се угодни.«

⁷Тогаш реков: »Ете, идам, напишано е за Мене во почетокот на книгата, да ја извршам, Боже, волјата Твоја.«

⁸Кога погоре рече: »Жртви и дарови и сепаленици за гревот — што се принесуваат според Законот, Ти не посака и не Ти се угодни«,

⁹а потоа рече: »Ете, идам, Боже, да ја извршам волјата Твоја«, со тоа Он го премавнува првото, за да го постави второто.

¹⁰Според таа волја сме осветени со приносот на телото на Исуса Христа еднаш засекогаш.

¹¹И секој свештеник стои секој ден, служејќи и принесувајќи многупати едни и исти жртви, кои што никогаш не можат да ги премавнат гревовите;

¹²а Он, принесувајќи само една жртва за гревовите, засекогаш седна оддесно на Бога,

¹³очекувајќи понатаму додека непријателите Негови не бидат ставени во подножјето на нозете Негови.

¹⁴Зашто преку едно принесување осветуваните Он ги направи засекогаш совршени.

¹⁵А ни посведочи и Светиот Дух. Оти, откако порано рече:

¹⁶Тоа е заветот, што ќе им го дадам по оние дни, вели Господ: ќе ги вложам законите Свои во срцата нивни, и во мислите нивни ќе ги напишам, Он додава:

¹⁷и за гревовите и беззаконијата нивни нема веќе да се сетам.

¹⁸А каде што има проштавање за нив, таму веќе нема приноси за грев.

¹⁹И така, браќа, кога имаме слобода да влегуваме во Светилиштето преку крвта на Исуса Христа, по нов и жив пат,

²⁰што одново ни го отвори Он низ завесата, односно преку Своето тело,

²¹и кога Го имаме Големиот свештеник над домот Божји,

²²тогаш да пристапиме со искрено срце, во полна вера, откако ги очистиме срцата од лукава совест со попрскување и откако го измиеме телото со чиста вода;

²³та да го држиме исповеданието на надежта цврсто, оти верен е Оној, Кој се заветувал.

²⁴И да бидеме внимателни еден кон друг, за да се поттикнуваме кон љубов и добри дела,

²⁵не напуштајќи го своето собрание, како што некои имаат обичај, туку да се поучуваме еден друг, и тоа во толку повеќе, до колку гледате дека се приближува судниот ден.

²⁶Зашто, ако, откако ја познавме вистината, своеволно грешиме, тогаш нема веќе жртва за гревови,

²⁷туку некакво страшно очекување на суд и јаростен оган, што ќе ги проголта противниците.

²⁸Ако оној, што се одрекол од Мојсеевиот закон, пред двајца или тројца сведоци, безмилосно се накажува со смрт,

²⁹тогаш, колку ли потешка казна, мислите, ќе заслужи оној, што го подгазил Синот Божји и ја сметал за нечиста крвта на заветот, преку која е осветен, и Го похулил Духот на благодатта?

³⁰Оти ние Го знаеме Оној што рекол: »Одмаздата е Моја, Јас ќе отплатам«, вели Господ. И пак: »Господ ќе му суди на Својот народ«.

³¹Страшно е да се падне во рацете на живиот Бог!

³²Потсетувајте се на вашите поранешни денови, кога, откако се просветивте, поднесовте голема борба во страдањата,

³³било што бевте изложувани на срам и маки, било што станавте соучесници на оние, кои исто така страдаа,

³⁴зашто и на оковите мои се сожаливте и со радост позволивте вашиот имот да се разграби, знаејќи дека на небесата имате подобар и траен имот.

³⁵И така, не напуштајте ја вашата слобода, за која имате голема награда.

³⁶Најнапред ви е потребно трпение, па, откако ќе ја исполните волјата Божја, да го добиете ветеното;

³⁷зашто уште малку, сосема малку и »Оној што иде, ќе дојде и нема да се забави.

³⁸А праведниот преку верата ќе биде жив; а ако отстапи, нема да Ми биде по волјата Моја«.

³⁹Ние, пак, не сме од оние, што се отстрануваат за погибел, туку од оние, кои веруваат за спасение на душата.