Read Свето Писмо (Гаврилова) 1990 Евреите 13 Bible Online

Евреите 13 - Свето Писмо (Гаврилова) 1990 bible

Евреите 13

¹Братољубие нека пребива меѓу вас!

²Гостољубивоста не заборавајте ја, бидејќи преку неа некои, и не знаејќи, им укажаа гостопримство на ангели.

³Помнете ги затворениците, како да сте со нив затворени, и оние што страдаат, оти и сами сте во тело.

⁴Бракот на сите треба да е чесен, и брачното легло — чисто; а блудниците и прељубниците ќе ги суди Бог.

⁵Немојте да бидете среброљупци и задоволувајте се со она, што го имате. Зашто Сам Он рекол: »Нема да те оставам, ниту, пак, ќе те напуштам«;

⁶така што слободно да велиме: »Господ ми е помошник, и нема да се уплашам: што може да ми направи човек?«

⁷Помнете ги и вашите наставници, што ви го проповедаа словото Божјо, и, имајќи го пред очи крајот на нивниот живот, подражавајте ја верата нивна.

⁸Исус Христос е ист вчера, и денес, и во веки.

⁹Не впуштајте се во разни туѓи учења; оти е добро со благодат да се поткрепува срцето, а не со јадења, од кои немаа никаква полза оние, што ги употребуваа.

¹⁰Имаме жртвеник, од кого немаат право да јадат оние, што ѝ служат на скинијата,

¹¹бидејќи телата на животните, чија крв првосвештеникот ја внесува во Светилиштето за очистување на гревовите, се изгоруваат надвор од живеалиштето.

¹²Па затоа и Христос, за да ги освети луѓето со крвта Своја, пострада надвор од градските порти.

¹³И така, пред Него да излегуваме надвор од живеалиштето, носејќи ја Неговата поруга,

¹⁴бидејќи овде немаме постојанен град, туку го бараме оној, што ќе дојде.

¹⁵Преку Него, пак, секогаш да Му принесуваме на Бога пофална жртва, односно плод од усните, што го прославуваат името Негово.

¹⁶А доброчинството и милосрдноста не ги заборавајте, зашто такви жртви Му се благоугодни на Бога.

¹⁷Покорувајте им се на наставниците ваши и бидете послушни, оти тие, бидејќи се задолжени да одговараат, бдеат за вашите души — та со радост тоа да го вршат, а не со воздишки, зашто тоа не е полезно за вас.

¹⁸Молете се за нас, оти сме уверени дека имаме добра совест, грижејќи се во сѐ добро да постапуваме.

¹⁹Уште повеќе ве молам да го вршите ова, та поскоро да ви бидам вратен.

²⁰А Бог на мирот, Кој преку крвта на вечниот завет Го воздигна од мртвите големиот Пастир на овците — нашиот Господ Исус Христос,

²¹нека ве усоврши во секое добро дело, за да ја исполните Неговата волја, вршејќи го во вас она, што Му е Нему благоугодно, преку Исуса Христа, Нему слава во веки веков. Амин!

²²Ве молам, браќа, трпеливо примете го ова поучно слово: оти накратко и ви напишав и испратив.

²³Знајте дека братот Тимотеј е пуштен, со кого, ако скоро дојде, ќе ве видам.

²⁴Поздравете ги сите ваши наставници и сите светии! Ве поздравуваат браќата што се од Италија.

²⁵Благодат со сите вас. Амин!