Read Свето Писмо (Гаврилова) 1990 Евреите 7 Bible Online

Евреите 7 - Свето Писмо (Гаврилова) 1990 bible

Евреите 7

¹Оти тој Мелхиседек беше цар Салимски, свештеник на Севишниот Бог, кој што го пресретна Авраама, кога се враќаше од борбата со царевите, и го благослови,

²кому и Авраам му даде десеток од сѐ, и кој по значењето на името негово е прво цар на правдата, а потоа и цар на Салим, односно цар на мирот,

³без татко, без мајка, без род, немаше ни почеток на дните, ниту крај на животот и, по таков начин, е уподобен на Синот Божји, и останува вечен свештеник.

⁴Гледате ли колку е голем оној, кому патријархот Авраам му даде десеток од најдобриот плен!

⁵Оние од Левиевите синови, што примаат свештенство, имаат заповед да земаат по Законот десеток од народот, односно од браќата свои, иако и тие произлегле од бедрата Авраамови.

⁶Но тој, кој не му припаѓаше на нашиот род, зеде десеток од Авраама и го благослови оној, што имаше ветувања.

⁷Не може да има никаков спор дека помалиот се благословува од поголемиот.

⁸И така, овде смртни луѓе земаат десетоци, а таму — Оној, за Кого има сведоштво, дека е жив.

⁹И, така да речам, Левиј, кој прими десетоци, и сам даде десеток преку Авраама,

¹⁰бидејќи уште беше во бедрата на татка си, кога го сретна Мелхиседек.

¹¹Па така, ако совршенство можеше да се постигне преку левитското свештенство, бидејќи врз основа на него народот доби Закон, каква потреба има да се воздигне друг свештеник по чинот на Мелхиседека, и да се нарече по чинот на Арона?

¹²Оти, кога ќе се промени свештенството, тогаш станува потреба да се измени и законот.

¹³А Оној, за Кого се зборува ова, се вбројуваше во друго колено, од кое никој не беше пристапувал до жртвеникот;

¹⁴зашто е познато дека Господ наш произлезе од Јуда, а за свештенството од ова колено Мојсеј ништо не рекол.

¹⁵И уште појасно станува тоа, кога се воздига слично на Мелхиседека друг свештеник,

¹⁶кој станал таков не по силата на телесна заповед, туку по силата на вечниот живот.

¹⁷Оти се посведочи: »Ти си вечен свештеник по чинот на Мелхиседека.«

¹⁸А, пак, одменувањето на поранешната заповед се изврши поради тоа, што таа беше слаба и бесполезна,

¹⁹оти Законот ништо не доведува до совршенство; а се воведе подобра надеж, преку која се приближуваме до Бога.

²⁰И тоа не без клетва.

²¹Оти оние беа станале свештеници без клетва, а Он — со клетва, преку Оној, Кој Му рече: »Се заколна Господ и нема да се раскае: Ти си вечен свештеник по чинот Мелхиседеков«.

²²Затоа на толку подобар Завет стана залог Исус.

²³А тие беа многу свештеници, зашто смртта не им даваше да остане само еден;

²⁴а Он, бидејќи Сам, пребива вечно, има свештенство што нема да мине на друг.

²⁵Затоа Он и може и за вечно да ги спаси оние, што преку Него доаѓаат кон Бога, бидејќи е секогаш жив за да се моли за нив.

²⁶Таков Првосвештеник и ни требаше: свет, незлобив, непорочен, одвоен од грешниците и повисок од небесата,

²⁷Кој нема потреба, како и другите првосвештеници, секојдневно да принесува жртва прво за гревовите свои, а потоа и за оние на народот, бидејќи Он го изврши тоа еднаш за секогаш, откако Сам Себе се принесе како жртва.

²⁸Зашто Законот за првосвештеници поставува луѓе, што се немоќни; а словото на клетвата што е по Законот — Синот, Кој е вечно совршен.