Read Свето Писмо (Гаврилова) 1990 Јаков 1 Bible Online

Јаков 1 - Свето Писмо (Гаврилова) 1990 bible

Јаков 1

¹Јаков, слугата на Бога и на Господа Исуса Христа, испраќа поздрав до дванаесетте колена, кои живеат растурено.

²Радувајте се, браќа мои, кога ќе паднете во разни искушенија,

³знаејќи дека испитувањето на вашата вера создава трпеливост:

⁴трпеливоста, пак, нека ви биде совршена работа, за да бидете совршени и целосни, без никаков недостаток.

⁵Ако некому од вас не му достига мудрост, нека ја моли од Бога, Кој на сите им дава изобилно и без укор — и ќе му се даде.

⁶Но да се моли со вера и никако да не се сомнева; оти оној, кој се сомнева, прилега на морски талас, кого ветрот го издига и растура;

⁷таков човек нека не мисли дека ќе добие нешто од Господа.

⁸Човек што се двоуми во сите свои патишта е непостојан.

⁹Понизениот брат нека се фали со возвишеноста своја,

¹⁰а богатиот — со својата понизност, бидејќи тоа ќе помине како цвет од трева;

¹¹оти сонцето огрева и со својата горештина ја исушува тревата, и цветот нејзин отпаѓа, и убавината на нејзиниот изглед исчезнува; така ќе овене и богатиот во својот пат.

¹²Блажен е оној човек, кој поднесува искушение, бидејќи откако ќе биде испитан, ќе добие венец на животот, што Господ им го ветил на оние, кои Го сакаат.

¹³Ниеден, кога е во искушение, да не вели: »Бог ме искушува«, бидејќи Бог со зло не се искушува, и Он никого не искушува,

¹⁴но секого го искушува неговата похот, која го влече и мами.

¹⁵Потоа похотта, откако ќе се зачне, раѓа грев, а гревот, извршен, раѓа смрт.

¹⁶Не заблудувајте се, браќа мои возљубени.

¹⁷Секој добар дар и секој совршен подарок иде одозгора, доаѓа од Отецот на светлината, во Кого нема промени ни сенка од измена.

¹⁸Оти Он нѐ роди по Своја волја преку словото на вистината, за да бидеме почеток на Неговите созданија.

¹⁹И така, мои возљубени браќа, секој човек нека биде брз во зборувањето, и бавен на гнев,

²⁰бидејќи човечкиот гнев не ја извршува Божјата правда.

²¹Затоа, отфрлувајќи од себеси секаква нечистота и насобрана злоба, со смиреност примете го насаденото слово, кое може да ги спаси душите ваши.

²²Бидете извршители на словото, а не само слушатели, мамејќи се сами себе.

²³Оти, кој го слуша словото а не го извршува, тој прилега на човек, кој го гледа сопственото си лице во огледало;

²⁴ќе се погледне, па ќе си замине, и веднаш заборава каков бил.

²⁵Но кој ќе се задлабочи во совршениот Закон на слободата и остане во него, тој, бидејќи е незаборавлив слушател, туку извршител на делото, ќе биде блажен во своето делување.

²⁶Ако некој од вас мисли дека е благочестив, а не го обуздува јазикот свој, туку го мами срцето свое, неговата благочестивост е суетна.

²⁷Чиста и непорочна вера пред Бога и Отецот е оваа: да пригледуваш сираци и вдовици во нивните маки и да се пазиш да останеш неосквернет од светот.