Read Свето Писмо (Гаврилова) 1990 1. Петар 1 Bible Online

1. Петар 1 - Свето Писмо (Гаврилова) 1990 bible

1. Петар 1

¹Од Петра, апостолот на Исуса Христа, до избраните придојдени, растурени по Понт, Галатија, Кападокија, Азија и Витинија,

²по провидението на Бога Отецот, преку осветувањето од Духот за послушност и попрскување со крвта на Исуса Христа: да ви се умножи благодатта и мирот!

³Благословен е Бог и Отецот на нашиот Господ Исус Христос, Кој по својата голема милост нѐ прероди преку воскресението на Исуса Христа од мртвите за жива надеж,

⁴за наследство што не пропаѓа, чисто, кое не свенува, запазено на небесата за вас,

⁵кои Божјата сила преку верата ве запазила за спасение, приготвено да се открие во последно време.

⁶Затоа радувајте се, макар сега да сте малку во скрб — ако е потребно, — во разни искушенија,

⁷та вашата вера испитана, да излезе подрагоцена од нетрајното злато, па било тоа да е испитано и преку оган, за пофалба и чест и слава, кога ќе се појави Исус Христос,

⁸Кого Го сакате, иако не сте Го виделе, и во Кого верувајќи сега, а не гледајќи Го, се радувате со неискажана и прославена радост,

⁹примајќи го крајот на вашата вера — спасението на душите;

¹⁰кое го бараа и испитуваа пророците, што прорекоа за вашата благодат.

¹¹Откако испитаа, во кое или какво време им јавуваше Духот Христов однапред, Кој беше во нив, сведочејќи за Христовите страдања и славата која иде по нив;

¹²ним им беше откриено дека тие не за самите себе служат, а за нас со она што ви се јави сега вам преку оние, кои го проповедаа Евангелието од небото преку Светиот Дух, и во кое сакаат да вникнат ангелите.

¹³Поради тоа, возљубени, притегнувајќи ги бедрата на умот свој, бидејќи бодри, наполно надевајте се дека ќе ви се принесе благодатта при јавувањето на Исуса Христа.

¹⁴Како послушни чеда, не постапувајте според поранешните наши похоти, кога бевте во незнаење.

¹⁵Но, по примерот на Светецот, Кој ве повика, и вие самите бидете светци во сите ваши постапки.

¹⁶Оти е напишано: »Бидете свети, бидејќи Јас сум свет.«

¹⁷Иако Го наречувате Отец Оној, Кој не гледајќи кој е кој, секому му суди според делата, затоа поминувајте го времето на својот живот во страв,

¹⁸знаејќи дека со пропадливо сребро или злато не сте искупени од суетниот живот, кој ви се предаде од татковците ваши,

¹⁹туку со скапоцената крв на непорочното и чисто Јагне — Христос,

²⁰Кој е предназначен уште пред создавањето на светот, а се јави во последно време заради вас,

²¹кои преку Него поверувавте во Бога, Кој Го воскресна од мртвите и Му даде слава, та верата ваша и надежта да ви бидат во Бога.

²²Откако ги очистивте душите ваши со послушност на вистината преку Духот, за нелицемерно братољубие, сакајте се еден со друг постојано со чисто срце,

²³како преродени не од распадливо семе, туку од вечно преку словото на живиот Бог, Кој пребива во сите векови.

²⁴Зашто телото е како трева, и секоја човечка слава — како цвет од трева: се исушува тревата, и цветот нејзин паѓа;

²⁵но словото Господово останува засекогаш. А тоа е словото, кое ви е благовестено.